ZALEN October 21, 2023 : Vawiin khan South Tuipui MNF Official Candidate Dr. R. Lalthangliana chuan Muallianpui khuaah MNF campaign office a hawng a, MNF-ah mi thar a lawmlut nghal a, Dr. Thangtea chuan chhungkaw tan engmah intuak belh ka ngai tawh lo a, keimah min vote hian nangmahni in in vote a ni a ti.

Dr. R. Lalthangliana chuan an chhungkua chu sum leh pai tuak belh ngai tawh lo, Pathian khawngaihna avanga dam chhung ei tur nei an ni tih a sawi a, "Kei hi thlantlin leh ka nih chuan bial mipui leh Zoram mipui tan ka theihna zawng zawng hmangin ka thawk dawn a, chhungkaw tan engmah intuak belh ka ngai tawh lo a, keimah min vote hian nangmahni in in vote a ni," a ti.

Dr. Thangtea chuan Hnahthial bial tihhmasawnna tur nimin lawkah SASCI sum cheng nuai 500 finance department lamin an sanction fel tawh thu a sawi a. Hnahthial District mipuiten kawlphetha lama an harsatna pawh sukiang turin Power Sub-Station dinna tur peihfel a ni tawh thu a sawi bawk.

Heng bakah hian District-in a kentel department zawng zawng, DTO office tih loh chu Hnahthial District-ah bun fel vek tawh a nih thu a sawi a. MNF a sorkar leh chuan department zawng zawngte hi a nih tur anga thawk thei turin an tihfel vek tur thu a sawi bawk.

Mi thar duhawm tak takten MNF an zawm zel chu lawmawm a tih thu a sawi a, MNF ah chuan mi hlui leh mi thar an awm lova, Mizo zawng zawngte ta a ni, a ti. Vawiinah South Tuipui biala party tin official candidate-ten scrutiny an paltlang vek chu lawmawm a tih thu a sawi bawk.