Aizawl: Kelkang harhna chhim leh damna beiseia pan mi thahnem tak an awm reng a, a chang chuan mikhual hi 4000 dawn lai te pawh an tling thin. Zalen palaiin Kelkang Upa Chawithanga a biak naah mikhualte hi a tlangpuiin Thawhtan leh Thawhlehni velah lo kalin kar tawpah an haw leh thin a, Pathian-ni hmanga cham tlang pawh mi engemaw zat an awm thin tih a sawi a. Ei leh in chungchangah harsatna an tawk lemlo nia sawiin, "Mikhual te hian buhfai an intum tlangpui a, chawhmeh chu a rem ang ang kan hmeh mai a. Kan harsatna ber chu in khatin mikhual 60 te kan nei a, riahna hmun tha kan pe thei lo a. Sumhmun leh remchang lai apiangah te an riah a ngaih bakah inbualna leh inthiarna (ekin) kan indaihlo thin erawh hrehawm kan ti hle a ni," a ti. Upa Chawithanga chuan tui leh eng chungchanga harsatna an tawh thin chu PWD Minister Lal Thanzara'n an khua a tlawh hnuah a ziaawm tih a sawi a. Mikhual pantu an awm chhung chu thlarau thianghlim hnathawh nia an hriat vangin buaipui zel an inhuam tih sawiin inkhawm dar hmasa (6:15) rik hma daih tlai dar 5 vel atangin biakin ah an zai tan tawh niin a sawi bawk. Upa Chawithanga chuan mikhual te chu 'Tawngtai leh Pathian chawimawi tura lo kal' nia a hriat thu a sawi a. Chhun zan zawmin an tawngtai a, damna chang pawh an thahnem tawh hle tih a sawi a. Sawntlung lei hnawih leh ei vangin mi thahnem takin damna hi an chang tawh tih a sawi bawk a ni. Kelkang khua ah hian tum engemaw zat Harhna a thleng tawh a, tun tum harhna hi June ni 12,2013 atanga intanin zantin chawl lovin an inkhawm thin a. Mizoram hmun hrang hrang atangin mi sing telin an pan tawh a ni.