Aizawl: Kelkang Harhna chhima pantu chu tunlai hian nidang aiin an tlahniam deuh a, hei hi a chhan ber chu khaw nawmloh vang nia hriat a ni. Kelkang atanga thudawn danin Harhna chhima kal hi an la awm reng nachungin khaw thatlai chu an tluk phalo deuh a, mahse mikhual hi 4000 vel chu an nei deuh reng tho tih an sawi a. Khua a that chuan tlawhtu hi an tam leh an rin thu an sawi bawk. Nidanga an harsatna ber thin tui chungchangah chuan fur ruahtui a tlak tawh avang leh sawrkarin in tin syntex a pek avangin an harsatna zualpui chu a ziaawm tih Zalen an hrilh a. Riahna tur leh inthiarna chungchangah erawh chuan harsatna an la nei chhunzawm zel tih an sawi. Kelkang Harhna chhimtu hi chhinchhiah danin khaw 398 an awm tawh a, Mizoram khaw tam zawkin an tlawh tawh nia lang si, chhinchhiah a tlem hle chu engnge a chhan tih Zalen zawhna chhangin Reception duty te chuan, “Keini pawhin tlem kan ti a, khaw penhlelh deuh chhinchhiah loh kan nei em tih te, khaw awmzat leh tuldangte kan record leh Map hmangin enfiah kan tum mek a ni,” an ti.