Aizawl: Kelkang harhna chhima pantu a ni telin an pung zel a, tunlai hian a vanglai thleng chhovin mikhual 7000 velin an chamchilh mek a, hetih lai hian bus hmanga kal an tam avangin khawpui lamah bus tlan a tlem phah thung. Zalen palai thudawn danin nikum June 12 atang khan zantin Kohhran inkhawm neih a ni a, chhun lamah chuan Kohhran Upa te kaihhruainain Bethel neih thin a ni a, a bak chu mahni remchan dan ang angin hun an hmang mai thin a ni. Kelkang hian mikhualte lo dawngsawngtu tur counter an siam a, heta tang hian mikhualte chu in hrang hrangah an semdarh leh thin a ni. Aizawl City Bus Owners Association hruaitute chuan tunlai hian ni tin Bus 75 vel Kelkangah hian an kal thin a, hei vang hian Bus timing pawh siam danglam hret a ni a, stand pakhata minute 2 vel dintir thin chu minute 5-ah pawhsei a ni tih an sawi. Aizawl ah nitin bus 171 an tlan. Kelkang kal leh haw man atan hian bus pakhat zelah Rs. 18,600 an la thin a, ni khat nghah man (waiting charge) hi Rs. 3000 a ni. Kelkang YMA hruaitute chuan mikhualte avangin ei leh in ah harsatna an tawk lo tih an sawi a. “Chawhmeh chi hrang hrang dal, alu, buhfai leh thil dangte hi an rawn keng zel a, chuvangin mikhualin min chawm a ni ber zawk,” an ti.