Kendall Jenner tia khawvelin a hriat lar Kendall Nicole Jenner hi November 3, 1995 khan Los Angeles, California-ah a piang a, a nu leh pa te hi Caitlyn Jenner leh Kris Jenner te an ni. Kendall hi - socialite, model leh television personality niin, a hmelthatna leh pianalhna chu a larpui a ni. 

An chhungkua hian E! reality TV program Keeping Up with the Kardashians ah an lang thin a, an chhungkua hian an lar vet vet hle. Kum 2012 khan Sherri Hill tan Spring 2012 Fashion Show-ah a vawi khat nan a inlan a, a hawikir tawh lo. Amah hi feet 5'10 niin, a taksa hriselna a ngaipawimawh hle niin an sawi thin. 

Heti khawpa hmeltha leh pian nalh ta chuan kawppui tur pawh a haichham lo hle a, a duh zawng a piang a thing emaw tih mai tur a ni. Mahse khawthlang milar dangte ang thoin pakhatah a nghet rei thei thin lo a, kum 26 a nih meuh chuan 'ex' tia sawi tur a ngah ve ta viau mai. 

Kardashian-Jenner chhungkua hian kawppui thlak zung zung hi an intihhmuh emaw tih mai tur a ni a, Kendall pawh a bang bik lo. A kawppui hmasa ber nia an sawi chu Julian Swirsky a ni a, he tih hun lai hian kum 16 mi chauh a la ni nghe nghe. Julian Swirsky hi Justin Bieber-a nupui ni ta Hailey Baldwin nen pawh sawi zawm lo ni tawh thin kha a ni a, 2011 khan Kendall nen hian an inthen a ni. 

Julian Swirsky nen an inthen hnu hian Kendall hian Julian Brooks a 'date' zui a, 2012 leh 2013 chho kha chuan an hlimdun viau thin a ni awm e. Julian Brooks nen an inthen hnu hian Harry Styles nen an in 'date' ve leh zui bawk. Harry Styles nen pawh an ni rei chuang lo a, Ashton Irwin nen an inkawp zui leh zat. 

Kawppui tur a haichham lo kan tih tawh kha - Lewis Hamilton nen an inzui ve leh zuai niin khawthlang media ten an tarlang. Lewis Hamilton zawh hian American singer-songwriter Nick Jonas nen an in 'date' leh a, NBA player Blake Griffin nen an inkawp zui leh bawk. Hemi hnu hian NBA player tho Devin Booker nen an inngaizawng zui leh a, kum hnih lai an inzui. Devin Booker nen an in 'date' thu hi 'Keeping Up With The Kardashians” reunion show-ah a sawi chhuak nghe nghe. 

American model Kendall Jenner leh basketball star Devin Booker te hi kum hnih an inzui hnuah tun hnai khanan inthen ve leh a, tunah chuan Kendall hi a single mek. Kendall leh Booker te hi June 2020 atang khan an inzui ta a, an inhmeh bawk nen an chanchin hian ngaihven a hlawh thin hle. Nikum June khan an anniversary pualin social media lamah an thlalak dunna an tarlang a, inhual mai tur anga sawi ni hman mah se rei an daih ta bik chuang lo a ni.