Pathianni zan Indian Super League final khelhah final luh vawikhatna Hyderabad chuan an khingpui Kerala Blaster chu penalty hmangin an hneh. Team pahnih hi hun pangaiah si khat ve ve thunin an inhnehtawk a. Extra time pek belhah goal a luh belh lo vangin penalty shoot-out hmanga chak zawk zawn a ni. 

Penalty-ah hian Hyderabad goalkeeper Laxmikant Kattimani a chetha hle a, Blaster player pathum lai penalty pet a dan sak a, ISL final an luh vawikhatnaah a team a champion pui. Kerala atangin mi pakhat chiahin goal a khung a, Hyderabad lamah mi pathumin thunin 3-1 in Hyderabad an chak ta zawk a ni. 

Kerala Blaster hian Rahul KP goal khung hmangin minute 68-ah hma an hruai a, 57% lai ball chang a passing pawh ngah zawk Blaster hian an goal khat chu hum tlangin an champion-pui dawn emaw tih hnuah Hyderabad tan hun pangai minute 3 chiah a awm tawh tihah Sahil Tavora chuan goal a rawn thun ta hlauh mai. Hun tawp zui nghalin goal khat ve ve thunin an inhnehtawk a, extra time-ah pawh an la inhnehtawk chhoh zel vangin penalty hmanga chak zawk zawn a ni ta. Hyderabad tan Joao Victor, Khassa Camara leh Halicharan Narzary ten an pet goal a, Blaster lamah Ayush Adhikari chauhin pet goalin 3-1 ISL final vawikhat luhna Hyderabad chu an champion ta a ni. 

PNJ Stadium, Fatorda (Goa)-a final khelhah hian fans ngah Blasters an phur a, Hyderabad fan te an tlem bik lo. ISL final tum hnih lai khel a, a beisei ber nomawi la hlawh chhuak lo Blaster ten champion nomawi chan nawn an tum lo, team tha tak tak an paltlang nual tawh vangin leh inkhelh an thu nun deuh zawk vangin chak mai an inring hman ngei ang le! Mahse, Hyderabad lam an deau duh bik der lo, hun tawp dawn thleng si phur zawkah tang mahse tha thlah lovin theitawp an chhuah a, final vawikhat luhnaah nomawi an chawi thei. 

League-ah point 38 neiin Hyderabad hi pahnihna an ni a, game 20 khelhah tum 11 chakin game 4 chiah an tlawm, tum 5 an draw bawk. Semi-final playoff-ah ATK Mohun Bagan hnehin final an lut. 

Point 34 hmua pa 4-na playoff khel phak hram hram Kerala Blasters hi game 9-ah chkna changin tum4 an tlawm a, match 7 draw an nei bawk. Semi-final playoff-ah Jamshedpur FC hnehin final an lut. 

2021-'22 season ISL award dawng te:

ISL Shield Winners - Jamshedpur FC

ISL Trophy winners - Hyderabad FC

Hero of the League - Greg Stewart (Jamshedpur FC)

Golden Glove - Prabhsukan Gill (Kerala Blasters)

Golden Boot - Bartholomew Ogbeche (Hyderabad FC)

Emerging Player of the League - Roshan Singh (Bengaluru FC)