Aizawl: Khatla Biakin bul kawngpui tih zauh hnathawh mek chu Bialtu MLA Pu Vanlalzawma, DGP Pu Thianghlima Pachuau, Local Council, YMA, Kohhran hruaitute leh NECS hotuten nimin zing khan an thlirho. Zalen thudawn danin he kawngpui zauh hna hi a chanve vel zawh a nih hnuah sum awm loh avangin chawlhsan lailawk a ni. Fur ruahtui tlak hma a thawh zawh a nih loh chuan Police Headquarters building sak mek tan a hlauhawm dawn avangin kalkhawmte hian thutlukna siamin Bialtu MLA in MLA fund a pe anga, NECS lamin CSR kaltlangin MLA thawh zah donation a pe ve dawn bawk niin Zalen chuan thu a dawng a. Khatla Local Council ten a rang lama hnathawk chhunzawm tura rel a ni a, hnathawh dan erawh NECS Engineer ten an endik thung dawn ni a thu dawn a ni. Bialtu MLA Pu Vanlalzawma pawhin Police department ten vengchhung mamawhna hria a Local Council te ruahhmanna an siampui chu lawmawm a tih thu a sawi a, NECS ten Police Headquarters sak paha Khatla khawtlang tana CSR programme anga an thawh thei chu lawmawm a tih thu a sawi bawk.