Khawhai khawtlang chuan Mizorama ball beng thiam ber a nihna chu ropui takin lawm an tum a, an player-te pawh Thawhtanni hian an haw dawn a, ropui takin an hmuak dawn.

Zirtawpni zana khelh zawh tak, Mizoram Volleyball Association-in a buatsaih, JJS Trucking BharatBenz Inter Village Tournament 2023-ah Khawhai Village Council hian mipa final-ah Hunthar Local Council chu 3-1 (12-25, 25-15, 25-13, 25-21)-a hnehin Mizoram ball beng thiam ber khua an ni.

Hmuahna hmasa
Khawhai khaw pasalthate hian Thawhtanni tuk hian an khua an pan dawn a, Serchhip lam kawng zawhin an khua an lut dawn a, khawtlangin kawtchhuahah lo hmuah an tum.

VC Secretary PC Lalsangzuala chuan, “Tlai dar 3:00 velah an lo thlen kan beisei a, kan khaw kawtchhuah, Talhkuang Tlang kan tihah kan lo hmuak dawn,” tiin Pathianni tlaia organising committee thutkhawmah an rel tih ZALEN a hrilh.

Khawhai Town Hall-ah champion lawmna hun tawi buatsaih zuiin an team member-te chu parthi awrhtirin an chawimawi dawn tiha  sawi bawk.

Ball beng thiam ber an nihna lawmna pawh pui tham zawkin an huaihawt dawn bawk tih VC ziaktu chuan a sawi a, ruahmanna kimchang erawh an la duang lo tih a sawi.

Beiseina thleng dik
Khawhai coach David Malsawmtluanga chuan an champion chungchangah hian a beisei ang thil a thlen thu a sawi.

“Mizorama player thate chu kan hre ve deuh vek a, kan player-te ena an that dan ka thlirin ‘kan champion ka ring sa’ chu ti ngam chiah lo mah ila, ka beisei a ni,” tiin a inbeisei sa thu ZALEN-in a biaknaah a sawi.

A naute hi an khuaa awm sa tlem chu tournament tan hma thla khat vel atang tawhin an practice tan a, Aizawla awmte hawin chawlhkar khat pawh tling mang lo deuh chauh an khuaah an khelh ho hman thu a sawi.

Tournament hmachhawn tura Aizawl an thlen hnuah Tuikual South-a AMC Multi Complex-ah inkulhin indoor stadium hrang hrang hawhin an inbuatsaih zui bawk.

Inbuatsaih nan hian Tuichang bialtu, Deputy Chief Minister Tawnluia’n Rs. 2,00,000 a pe a, hei hi tangkai takin an hmang a, an lawm hle tih PC Lalsangzuala chuan a sawi.

Thawhrim rah
Khawhai Games & Sports Association president nihna chelh mektu ni bawk, David-a chuan an champion chu an thawhrimna leh thawhhona that vang liau liau nia a hriat thu a sawi.

“Kan naute hi practice pawh an ti tha a, an fitness a tha em em bawk a, chumi zar chu a ni,” a ti a. Anmahni tantu te, an khawtlang hruaitu leh coaching staff-te inpekna zar a ni bawk tih a sawi.

Champion team captain, Lalhmunmawia (Mapuia) pawhin an zavaia an thawhrim rah a ni tih a sawi ve bawk a. “Kum lamah pawh kan inrual khat tlang a, kan inkawmngeih a, kan team work a tha em em a ni,” a ti.

Mi mal chawimawina phu inti lo
Final-a an hneh tak, Hunthar venga an unauva khawsa mek, Mapuia hi tournament-a Best Spiker atan thlan a ni a, a mi mal chawimawina dawn chu phu lo hlea a inhriat thu a sawi.

“Kan zingah a vannei berah ka tang ni maiah ka inngai,” a ti a. Hetih rual hian a tang a, a bei nasa a, a thawkrim hle tih a sawi bawk.

Club level-a Mizorama volleyball inelna sang ber, Pro Volleyball-a Hunthar Volleyball Club tan pawha lo khel tawh, tuna Tuichangral Volleyball Club tana player tangkai tak ni mek, Mapuia hi kum 2020 khan college hminga a inkhelhnaah a ke a titliak a, hemi hnuah Pro Volleyball pawh khel leh tawh mah se tournament liana chawimawina a dawng thei chu a lawm tak zet tih a sawi bawk.

Ball beng thiam khua

Khawzawl district-a mi, Khawhai khuaah hian mihring 3,500 bawr vel (census2011.co.in) an cheng a, volleyball an beng nasa a, a thiam pawh an thiam tih Mizoramin a hre tawh.

Kum 2022 Inter Branch YMA Championship-ah pawh khan final lut tawhin Hunthar Branch lakah an tlawm thung.

Coach David-a chuan an district volleyball association a nung tha a, an khua hi district association hnuaiah hian Zone A-ah awmin an ni pawhin an tinung tha a, chumi zar chu a nih thu a sawi.

VC secretary pawhin naupan lai atanga khel an tam a, an khel nasa tih a sawi a, tuna an player tam tak pawh hi an naupan lai atanga ball beng nasa an nih hlawm thu a sawi.

“Tun hma deuh khan KL Volleyball Club kan nei thin a, chutah chuan tuna kan player thate pawh hi an awm thin a, an beng nasa thin a ni,” a ti a. He club hi tunah awm tawh lo mah se an chhawr niin a sawi a, a neitu pawh tuna an assistant coach hi a ni nghe nghe tih a sawi.