Aizawl: Champhai North bialtu MLA TT Zothansanga chuan nimin khan a bial chhunga Trade & Commerce and Industries hnuaia NEDP tanpuina kaltlangin puanthui khawl Sewing Machine leh Mistiri bungrua Carpentry Tool a sem. Tanpuina semna Champhai Zote phaihmuna neihah TT Zothansanga chuan, "NLUP hi mirethei leh chhumchhiate’n eizawnna leh bultanna  an neih ve theihna tura duan, mi tam takin leirem an rahna programme a ni," a ti a. Harsatna hrang hrangte awm ve bawk thin mah se tluang taka a kal zel thei chu lawmawm a tih thu sawiin NLUP chu a mamawhtute’n an mamawh chhung chu a kalzel dawn niin a sawi a. Sawrkar Policy New Economic Development Policy (NEDP) hnuaiah hmasawnna ruhrel Infrastructure siamthat kawngah nasa taka tan lak a nih thu leh  rah duhawm tak a chhuah ngei a beisei thu a sawi bawk. Nimina sem tak te hi puanthui khawl 38 leh Mistiri bungrua 20 a ni.