Aizawl; Krismas leh Kumthar bawrah thil duhawm lo liantham a thleng lo a, lirthei midang tana hlauhawma tlan an awm vak loh thu leh kum dang aiin khawlai chhuah mipuiin nuam a, mi thenkhatin No Vehicle Zone sut an duhthu an sawi niin Lallianmawia, Traffic (SP) hnen atangin thu dawn a ni. Rethei zawkte thil pek a hluar nia a hriat thu a sawi tel bawk. Traffic SP chuan "Urlawk zan khan duty kan in siam tam deuh a, Veng chei nasat a nih avangin Veng neitute'n traffic hna min pui nasa a, an chungah kan lawm khawp mai a. Khawlai boruak a tha a, tlan a nuam a, midang tana hnawksak lian tham a awm lem lo a; Armed Veng chho khu kawng a tet avangin tlemin kan buai deuh tih mai a ni," tiin ZALEN a hrilh. No vehicle day ah mipui chhuak kum dang aia an tlem thu sawiin, "Ni 22/23 December chhoah chuan kum dangah chuan No vehicle Zone ah a tawt thin kha a ni a, tun tum kha veivak an tlem a, Kumhlui thlah Ni khan Krismas aiin an tlem lehzual a, mi thenkhat chuan No Vehicle Zone chu sut mai se an tih thu kan hnen thlen pawh an awm nual a ni," a ti bawk. Zodina lirthei ke 4 nei leh ke 2 nei dahna tura an ruahmanah pawh lirthei ke 4 nei dah an tam loh thu a sawi bawk a ni. "Kum dang zawng aiin retheite tanpui a tamin ka hria a, hman deuh atang khan kan ching tan a, social media '- FB, whatsapp, telegram-' leh media lamah tarlan a ni thin a, a kangkai zela kan intih hmuh ta zel niin ka hria," tiin New Market-a dawrkai pakhat chuan kan palai a hrilh a ni.