Khawlaia inzawrh

Jimmy Laltlanmawia
Tunlai social media leh khawlai titiah Food Truck, zan lama inzuar thinte chungchang sawi a tam hle a, thil engkim mai hian thatna leh that lohna an nei vek mai a, a dawngsawngtu leh a thlirtu azirin a inherrem dante pawh a awm zel a. Street food vendor-te chungchangah hian felfai taka anmahni khuahkhirhna leh kaihhruaina leh venhimna dan, The Street Vendors(Protection of Livelihood & Regulation of Street Vending) Act 2014 hi mumal taka India puma hman turin 4th March 2014 khan tlangzarh a lo ni tawh a.
Mizoram sorkar pawhin Mizoramah hman turin hriattirna, The Mizoram Gazette No. B.13017/87/2017-UD&PA, the 2nd November, 2017. Street Vendors (Protection of Livelihood & Regulation of Street Vending) Act (Central Act No 7 of 2014) a lo chhuah tawh a. He dan hian Mizoram tih ni mah se Autonomous District-te erawh chu a huam ve lo thung. Mizoram State Nodal Department pawh hriat angin UD&PA Department-te an ni nghe nghe a.
Street Vendors (Protection of Livelihood & Regulation of Street Vending) Rules, 2017 Bung 3-nain a sawi angin sorkar chuan Local Authority a din ang a, chu chu Town Vending Committee tih a ni ang a, member-te pawh a ruat ang tih a ni a. Municipal Corporation area-ah chuan Municipal Commissioner chu Town Vending Committee chairperson a ni a, Municipal area loah chuan Deputy Commissioner chu chairperson an ni thung. He dan hian member ruat leh tute member turte pawh a ruat lawk diam a, chung Vending Committee zingah chuan khawtlaia inzuar thinte aiawh mi 8, non official member a tel ve tur a ni a, chung non official member hmun thuma thena hmun khat chu hmeichhia an ni ngei bawk tur a ni.
Town Vending Committee hi an khawpui theuhah khawlaia inzawrh, street vending chungchanga mawhphurtu leh thuneitu ber an ni a, mawhphurhna pawh danin a ruat felsak thlap a. Town Vending Committee mawhphurhna leh tih tur pawimawh hmasate zinga mi chu khawpui chhunga street vendor-te chhinchhiah leh inzawrh phalna peka an thutna tur vending zone fel fai tak nodal agency be rawn chunga ruatsak a ni, heng bakah hian mawphurhna leh tih tur hrang hrang a nei bawk.
Town Vending Committee din bakah hian street vendor-ten an lungawi lohna thlenna tur, an pual bik liau liauin, he dan kan sawi Bung 4-nain a sawi angin Grievance Redressal Committee chu sorkarin a dinsak tur a ni a, state sorkar chuan Civil Judge emaw, Judicial Magistrate First Class pakhat Committee Chairperson atan a ruat ang a, member tur mi dang pahnih a ruat tel bawk ang. An mawhphurhna leh tih tur ber chu sorkarin an jurisdiction a ruatsak huam chhungah street vendor-te harsatna sutkianpui leh chinfel a ni. He committee thutluknaa lungawi lote tan he dan Bung 5-nain a sawi angin Appellate Committee din bawk tur a ni a, chu committee-ah chuan District Session Judge chu chairperson a ni ang.
Tunah hian Aizawlah hian vending zone-a puan a la awm tam lo hle niin a lang a. Hei bakah hian Food Truck Vendor-te harsatna tawh chungchang atang hian danin a phut ang leh mipui mamawhna leh ram hmasawnna milin hma latu turten hma an la tawk lo tih chu sawi lo pawh ni ila a chiang.
Heng dan kan sawi bakah hian hetianga kawtthlera inzawrhna chungchangah hian sorkar-in guide lines mumal tak a siam thlap a, DAY NULM Programme hnuaiah Support to Urban Street Vendors Operational Guideline fel tak a awm a, chu guide line chuan vendor-te hmakhua leh an sumdawnna tihhmasawn dan turte leh an vending zone develop-na tur atana project siam thlengin ruahmanna leh kaihhruaina a nei.
India ram khawpui dangah chuan street vendor-te hi khawpui tinuamtu leh khualzin hip nan an hmang tangkai em em a. India ram chauh ni loin khawvel khawpui lian leh khualzin tamna hmunah chuan zankhuaa kawtthler thil zuarte chu an lun em em a, chu chuan ram economy pawh a hawlh pha hial a ni tih an hria a, khawpui lian zawk leh changkang zawkah chuan dan hnuaiah kaihruaina mumal tak nen uar sauh sauhin an kalpui mek a ni.
Keini khawpuiah ve thung chuan dan kan neih reng pawh kan hmang tha hleithei lo a, danin hma la tura min phut ang pawhin hma kan la mumal thei lo a, a tuartu chu mipui bawk kan lo ni leh, hei hi hmasawnna tituanfumtu lian tak a ni. Zan lama khawlaia Food Truck kan hmuh thinte hi a lo mikhualtu veng tan chuan hnawksak tihtheihna chin a awm tam ang tih chu a hriatthiam rualin kan dan neih hi a nihna angin sorkar hian hmang sela chuan harsatna kan tawh tam zawk hi chu pumpelh theih an ni.
Dan kan sawi khi a hmingah pawh regulation & protection a ni a, prohibition lam a kawk lo. Mumal takin vending zone hi ruat fel ni sela, vending zone chhungah regulation tha tak hnuaiah fel takin thalai eizawnna dap mekte tan mumal tak, thlamuang takin ei zawnna a kalpui theih ang. Vending licence mumal takin pe chhuak se, vending zone-ah chauh inzuarin tha takin a kal theih a ni.
Vending licence nei, vending zone-a inzuarte chu a duh duhina hnawhsawn leh an eizawnna tihtawpsak ngawt pawh danin a phal reng reng lo a. Mizoram Street Vendors (Protection of Livelihood & Regulation of Street Vending) Scheme 2017 clause 16 sub (1)-ah chuan Town Vending Committee-in uluk taka ngaihtuahna hmangin street vendor an sawn chhuah turte an thutna/inzawrhna hmun thar an ruat felah chauh insawn tura hriattirna an chhuah thei a. He hriattirna pe chhuak tur hian an pek chhuah hun hma thla 2 hmain ruahmanna an lo siam fel tur a ni a, chu an hmun thar ruahmansaka pawh chu sumdawna kalpuina tur atana hmun remchang leh tha a ni tur a ni a. Zan khat thil thleng avanga, “Inpho tawh suh u,” intih ngawt te, “Inhnawk, helaiah inpho tawh suh u,” pawng tih ngawt kha vending zone-ah an thu a nih chuan a theih loh a, danin eviction hi a khap a ni tih kan hriat a tha a, eviction tih a ngai a nih pawhin hmun danga an inzawrhna tur ngaihtuahsak tur a ni, chu chu street vendor-te right a ni.
Tin, a inzuar turte pawhin dan zawm thlapin leh danin a phut an mawhphurhna hlen chhuakin, licence mumal tak neiin an inzuar tur a ni a, vantlang hmuna inzuar an nih avanga an tih tur leh tih loh tur dan an zawm tur a ni. Heng dan kan sawite hi vendor-te chuan an hre kilhkelh lo ang tih chiang sa a ni a; mahse, Town Vending Committee chu vendor-te hnena awareness pek thuah mawh a phur tlat thung si a ni. Tun kan dinhmunah hi chuan dan anga kan kal loh avangin mipui lamin kan tuar a, a tuartu leh tuartu kan inhmu thiam lo mai ang tih hi thil hlauhawm tak a ni.
Kan khawpui a chepin hmun kan inchan lo a, street vendor kan tih zingah hian temporary cendor te, permanent vendor te, seasonal vendor leh khawlaia inzuar kual chi an awm thei a. Kan khawpuiin tun dinhmuna kan mamawh chu vending zone mumal tak ruat niin a lang a, district khawpui dangah chuan kum 2015 khan vending zone hi mumal takin an khawpui theuha Town Vending Committee-ten an lo ruat fel tawh a, Aizawl khawpui ber, a mamawhna san berna siah ngaihsak a hlawh tawk lo deuha ngaih theihin a awm niin a lang. Hei hi a competent authority-ten chak zawka hma an lak a ngai a ni.

DOWNLOAD OUR APP

Read latest news on your phone

Khawlaia inzawrh

Latest News & Chhiar Hlawh