Khawpui a thang a, a kum telin mipui kan pung tual tualin lirthei pawh thahnem tak awm chho in nitin deuh tho lirthei avanga chetsualna hriat tur a awm reng a. Tin, thal laiin In kang hriat tur a awm reng rualin fur lai pawn In chim emaw leimin avanga chhiat tawhna hriat tur a awm reng thin a. Motor chetsualna emaw khuarel chhiatna a thlen hian damdawi lam thiam mamawhna a sang hle thin a ni. Kum 2014 May thla atang khan Aizawl khawpui chhungah two wheeler Paramedics hman tan a ni a, mipui ten an mamawh hunaan hman tura sorkar ruahhmanna hian hman tangkai a hlawh chho hle a, kum liamta 2015 chhung khan harsatna tawk mi 653 hnenah tanpuina an pe. Dr. Pachuau Lalmalsawma hnen atanga Zalen palai thudawn danin two wheeler Paramedics hi 4 awmin hengte hi Paramedic 6 ten an enkawl mek a, Motor chetsualna emaw khuarel chhiatna a lo thlen thulha che chhuak thei turin darkar 24 chhung an duty reng thin niin a sawi. Dr. Pachuau Lalmalsawma chuan Paramedics te chu Health Worker training chhuak tawh sorkar-in a chhawr lai mekte an nih thu Zalen palai hrilhin hengte hi two wheeler ambulance enkawl tura tih an nih hnu ah a hrana training pek that leh an nih thu thulakna chuan a sawi a, rikrum thilah tangkai an beisei thu Zalen a hrilh a ni. Two wheeler Paramedics hi mipui ten an mamawh chuan Health department in call centre a neihah ah an hrilh thin tur a ni a, call centre enkawltute chuan Two wheeler ambulance mamawh vanga call an dawn tam lutuk loh thu Zalen palai hrilhin phone call ai chuan Aizawl Civil Hospital Casualty atanga an thudawn atangin Paramedics te chu an kal chhuah hnem zawk thu an sawi. Paramedic zinga mi Albert-a chuan khawpui chhunga chhiat tawhna a thleng tih an hriat chuan phone call dawng kher lo mahse an kal chhuah nghal mai thin thu Zalen palai hrilhin, social media atanga chetsualna a thleng a ni tih an hriat pawn tlawmngaih chhuaha harsatna tawk buaipui tura an chet chhuah nghal mai thin thu a sawi a. Two wheeler ambulance enkawltu 6 te chu duty hun bi an in siam hran thin thu sawiin, casualty-ah chetsualna a thlena mipui tanpui nghal mai thei turin darkar 24 chhung an duty reng thin thu a sawi. National Ambulance Service call centre-a thawktute chuan Ambulance pangngai mamawh phone call an dawn tam thin thu Zalen palai hrilhin, kum liamta 2015 April atanga December thla thleng khan phone call 57662 dawngin Ambulance mamawh 20559 awmah tum 20447 ambulance an tirh chhuah thu an sawi a. Ambulance indaih tawk loh avang erawh chuan mamawh tute hnenah an pek vek theih loh thin thu Zalen palai hrilhin, a thlawna hman theih a nih ang hian Ambulance indaih tawk awmse tun ai hian mipui lam pawn hman tangkai na chang hre leh zual se an duh thu an sawi. Nau nei tur Ambulance mamawh te phei chu an haw lam leh kal lam Ambulance hman man chawi a ngaih loh thu mipui ten hre tam zual se an duh thu National Ambulance Service thawktute chuan an sawi a. Hetih lai hian uang thuang chunga call centre be pawp an awm thin chuan an hnathawh a tih khaih lak fo bakah phone bill a chawi hnem thin thu Zalen palai an hrilh a. National Ambulance Service-a thawktute chuan damlo leh harsatna tawk te tan Phone No. 102 ah engtik lai pawhin a thlawna biak theih reng a ni tih an sawi a, hetih rual hian uangthuang leh dawt hmanga biak ching an awm thin avangin a mamawhtu te tak tak chauhin be thei se an duh tih an sawi.