Aizawl: Central YMA buatsaihin Zirtawpni kalta khan Aizawl khawpui chhung Branch YMA pualin Training of Trainer on Tourism Awareness chu Tuikhuahtlanga Central YMA Hall-ah neih a ni. Khualzin mite hip tura hmalak dan tur kawhhmuh tur te puala training hi Central YMA Vice President R.Lalngheta’n a kaihruai a. Central YMA Asst. Secy. Peter Chhakchhuak chuan report pein hmalaknate a tarlang. Central YMA Gen. Secy. Lalhmachhuana chuan, “Khualzin mite hip tura sawrkarin hma a laknaah YMA chu Mizoram chhunga pawl lian ber, member nuai 4 chuang awmna Mizoram pum dapchhuak, District-a Sub. Hqrs. neia Group hrang hrang nei kan nih bakah kan theihna te sawrkarin hman tangkai an duh vangin sawrkar chuan thawhpuiah min duh a. YMA Branch 805-te hian awmze neia hma kan lak loh chuan kan inremna angin hna kan thawk lo vang tih a hlauhawm hle a. Khualzin mite hip tur chuan thliarkar rilru kan paiha rilru zau tak kan put a ngai  a,  a bikin faina lamah te, ramngaw leh nungcha humhalh kawngah te tan lak zual a ngai dawn a ni,” a ti. Tourism Deptt. Joint Director Saitluanga pawhin thusawiin, “Tourism Deptt.-in hmasawnna tura Central YMA a thawhpui thei hi lawmawm kan ti a. YMA-in theihtawp chhuaha khualzin mite hip tura hma a lak chuan nasa takin hmasawnna a awm ngei a beiseiawm a ni,” a ti bawk. Traning-ah hian Aizawl khawpui chhunga YMA branch 100 atangin aiawh pahnih theuh an tel a, Tourist Officer R.Lalchhani’n hriat tur pawimawhte Power presentation neiin kalkhawmte a hrilhfiah bawk.