Aizawl: Urban Development & Poverty Alleviation Secretary Dr.C.Vanlalramsanga chuan India ram khawpuiah kum 10 zelah mi rethei Nuai 40 velin an pung nia ngaih a ni a ti a. Khawpui mi rethei chawi kanna programme chu tan mar reng ngai a nih thu Zalen a hrilh. ‘India sorkar-in khawpui mi retheite chu a ngai pawimawh a, mi rethei chawikanna scheme hrang hrang sorkar laipui hian a duan phah ta a ni,’ tiin, ‘UD & PA Dept. chu khawpui mi rethei chawikanna kawng leh khawpui chawikanna kawnga hma la tur liau liaua din niin UD&PA department-in khawpui retheihna umbo kawngah ‘Housing for All leh National Urban Livelihood Mission’ te chu a ni tiin Zalen a hrilh. Dr. Ramsanga chuan, khawpuia mi retheite an retheihna khur atanga dawm kang tur chuan thiam thil (skill) tangkai leh chhenfakawm neih a ngaih thu a sawi rualin NULM pawh a dinchhan a ni a, ngunthluk taka khawpuia mi retheite eizawnna tlak ngei thiam thil zirtir a tum ber a nih thu kan palai a hrilh bawk. Mizoramah pawh India ram puma chhawr theih tur Skill Development training pek theih a nih nan National Skill Development Corporation (NSDC) nen sorkar an thawhho thu a sawi bawk.