Aizawl May 16, 2023: Deputy Chief Minister Tawnluia chuan vawiin khan mipui te intih thawvenna tur hmun, lei che avanga thiah tak Circuit House Building hlui thlang, Commerce & Industry Directorate opposite, Khatla North Kohhran Biak In bula sak tur Smart Street sakna lungphum a phum.

Aizawl Smart street lungphum phumna-ah hian Deputy Chief Minister Tawnluia chuan Aizawl hmun laili-a mipui te intih thawvenna tur hmun Smart Street sak a ni tur chu Aizawl in a mamawh tak a ni, a ti. Deputy Chief Minister chuan, "Aizawl Smart City atangin cheng vaibelchhe tam tak hmuh a ni a, chumi hmanna tur chu project hrang hrang kalpui mek a ni. Smart City hnuaia project-ho hi Department pakhat chiah hnathawh chi a nih loh avangin Department hrang hrang nen a inbiakna leh guidelines mumal taka thawh thin a ni," a ti.

Tawnluia chuan, "Smart Street enkawl zui turin sawrkar, kohhran leh khawtlang hruaitute thawhhona tha tak neih a pawimawh. Duh anga project tan a nih theih loh chhan chu a project sakna hmun tur a lo awm hmasa te, hmun remchang zawka sawnchhuah an ngaih avangin hna tan mai theih loh a ni," a ti. Project thawktu tur te leh contractor-te chu chulmam nawn ngailo a felfai taka hna thawk turin a hrilh bawk.

Aizawl Mayor Lalrinenga Sailo pawhin sawrkar-in a project-ah thalaite lam hawi project-te a ngai pawimawh a ti a, Smart Street pawh sak zawh a nih hnuah fai taka enkawl zui a pawimawh a ni, a ti.

Smart Street lungphum sa tu tur te hi Unique Consultancy Service niin, a project hi Aizawl Smart City hnuai niin ,a thawhna man tur hi cheng vaibelchia 3.28 a ni. Mechanical Parking, Open Gym leh intihhlimna tur thil chi hrang hrang awm thei tura ruahman a ni.