ZALEN September 28, 2025: NGO Co-ordination Committee, Khawruhlian chu Zirtawpni zan khan an thukhawm a, Khawhruhlian luh leh chhuahna kawng chungchangah a hnuaia mi ang hian resolution an siam a, NGO hrang hrang President ten hming an ziah hnan a ni.

“Kum 2017 atang khan NH-150 (Khawruhlian heltu kawng) hi laih tan a ni a. Hemi kum atang hian Khawruhlian khua kal pawhna tur kawng a buai tan a. Laih zawh a nih meuh chuan, kawng thar laihin chhiatna hrang hrang a thlen avangin Khawruhlian khua hi tlawhpawh hleih theih a ni ta lo va. Khaw kal pawhin tur kawng hi siam ni hlawm mah se, duhthu a sam lovin, tunah hian Motor lian lut thei lovin a awm mek a ni. Chuvangin, Khawhruhlian khaw chhung luh leh chhuahna kawng hi a nihna tur ang tak leh rang taka siam kan duh a. September 30, 2025 ral hma ngeia hmalakna leh bawhzuina kan hmu lo a nih chuan tiamchin awm lovin Khawruhlian paltlang theihna kawng zawng zawng dan chah lai lawk a ni ang.”

Khawruhlian Joint YMA, Khawruhlian Branch YMA, MHIP & MUP MHIP & MUP, Khawruhlian Vengthar Branch YMA, MHIP & MUP, Khawruhlian Vengpui Branch YMA, MHIP & MUP leh MZP Sub-Headquarter Khawruhlian te chuan hming an ziahhnan a ni.