Aizawl: Sarva Siksha Abhyian (SSA) chhinchhiah danin Mizoram naupang school kal rual, kum 6 atanga 14 inkar school kallo 5702 an awm a, Mizoram khawthlang lam Lunglei, Lawngtlai leh Mamit district ah te an tam zual. SSA thawktu ten Zalen an hrilh danin kumin a school kallo data an lak hi September 2015 behchhana tih a ni a, uluk taka thawktute hmanga survey an neihna ah hetiang zat hi naupang school kallo an hmuchhuak tih an sawi. Lunglei, Lawngtlai leh Mamit district ah naupang school kallo an tam chhan chu khawthlang lam depa awm hnam thenkhat Chakma leh Bru an tam vang niin an sawi a. "Heng hnam te hi an pemkual in an insawn fo mai a, mobile teacher te nen thlamah leh an chenna hmunah te kal chilh hma kan la a. Mahse a buaithlak em avangin kan titawp leh a, chuvangin kan tan pawh hmalak a harsa khawp mai," tiin SSA thawktu te chuan kan palai an hrilh. Hmathar lak an tum dan sawiin SSA thawktute chuan, "Mau leh di hmangin lehkha an zirna tur hulhliap kan siam a, heng hmunah te hian kan zirtir thin a. Chubakah zirlaite awm lailawkna tur 'Residential Hostel' siamin lehkha kan zirtir thin a ni," an ti bawk. SSA thawktute chuan hmarchhak state thenkhat Assam leh Meghalaya te pawh Bangladesh ramri ah bik hian zirna lamah an hnufual ve hle tih an sawi a. Mizoram chu a mihring cheng zat atanga chhutin naupang school kallo an tlemna pawl anih thu Zalen an hrilh bawk.