ZALEN September 28, 2024 : Central Young Mizo Association chuan Khawtlanga sualna pun lun chungchang leh Rorel Inkhawm chungchang hriatirna Sub-Headquarters, Group leh Branch YMA te an thawn a, sualna pung chho zel do kawnga theihtawp chhuah a tan la thar tur an ngen.

CYMA chuan, "Khawtlang nuna sualna lo pun lun zel leh hemi in a kaihhnawih, Naupang/Tleirawl zan len chhuah chungchangah Central YMA-in thuchhuah a lo nei tawh a. (vide No. CYMA 33/2023-2024/91 of 5.9.2024) Naupang/Tleirawl ten tul leh pawimawh ni lova zan len an chin hi sual pun lunna bul a nih avangin, khawtlangah rah tha lo tak a chhuah thin a. Tul lova mi pawikhawihna leh insual rawnte kan ching ta zel hi a pawi tak zet a. Hemi chungchangah hian Sub- Hqrs, Group leh Branch YMA-te, mahni huamchhung theuhvah tan la tur leh khawtlanga sualna pung chho zel do kawnga theihtawp chhuaha tan la thar turin kan inngen a ni," an ti.

26.9.2024 (Ningani)-a Central YMA Executive Committee thukhawm chuan, October 24,2024 (Ningani)-a R. Dengthuama Indoor Stadium-a, YMA Rorel Inkhawm Vawi 4-na an neih turah, Budget ruahman Rs.9,00,800.00 (Cheng nuaikua zariat) chu Sawrkar leh midang puihna tel lova, YMA sum atanga hman ni se tiin a rel thu an lehkhaah hian an tarlang tel bawk.