Aizawl: Kolasib Tuitha veng khawtlang chuan Zirtawp zing khan misual thurualpui leh humtu a puh Amir Laldingliana te in an thiahsak. Thudawn danin Tuithaveng khawtlang hruaitu te hian Amir Laldingliana hi a U fapa Misba Uddin Lasker, tun hnaia motor ruk avanga man, tlan chhuak nen inthurual nia ringin March ni 5 ral hmaa an in chhuahsan turin lehkha an pe a, Amira hi Court ah kalin Court chuan khawtlang hruaitu te chu kut thlak rihlo turin a hriattir a. Mahse Zirtawp zing khan khawtlang hi inkokhawmin in hi an thiat a, hei hi Police lamin an hriat veleh OC hovin mi 7 an thleng thla a, Police te chuan Court Order awm lai a ni a, kut thlak lo tura an hriattir chungin mipui an that hnem avangin an dang hneh lo a ni. Amir a nupui Lalmuankimi chuan Misba Udin Lasker chu kum 2 kalta khan thla 2 vel a chenpui a, Bike ruk case vangin Jail ah a tang tih sawiin an pa chuan inhnamhnawihna a nei lo niin a sawi.