FIFA chuan 'World Men's Ranking' thar ber tichhuakin football thiam ram Brazil-in pakhatna an luah a, point 9.25 zet hlohtu leh ranking hnuhnung bera 9-na Mexico chu 12-naah an tla thung. 

Vanneithlak takin World Cup khel turin in pet tling hlauh mah se Wales chuan hma an sawn tehchiam chuang lo va, Gareth Bale leh a pawl te hian 19-na an hauh phak hram. 

FIFA World Ranking June 2022-a ram ropui te chu:

#1 Brazil - 1837.56 points
World Cup tum nga zet chawi tawhtu Brazil hi ranking hnuhnung ber March thlaa chhuakah pawh khan pakhatna an ni a, tun tumah pawh point 1837.56 neiin an hmun ngai an la luah thei. FIFA ranking hnuhnung ber aiin point 4.87 a sang zawkin FIFA chuan khawvel football thiam ber ram an nih a nem nghet. 

Neymar leh a pawl te hian March leh June thla khan match hnih khelin an chak ve ve. An hmachhawn te hi Asia team tha pahnih niin a hmasa zawkah South Korea chu 5-1 in an sawp a, an match hnihnaah Japan lakah si khat faiin an chak bawk. 

#2 Belgium - 1821.92 points
Belgium hian point 5.08 an hloh ve thung a, FIFA World Men’s Ranking-ah pahnihna dinhmun luah nawnin point 1821.92 an nei mek. European team dang te ang bawkin Belgium pawh hian March leh June thla inkar khan UEFA Nations League game li an khel.  

An match hmasa berah Netherland-in 4-1 in an sawp a, match hnihnaah Poland chu 6-1 in an sawp let ve thung. Wales draw lehin Poland an hneh nawn bawk.

#3 Argentina - 1770.65 points
Lionel Messi leh a pawl te Argentina hian point 5.52 hmuh belhin pathumnaah an inhlang kaia tunah hian point 1770.65 an nei mek. 

Tun hnaiah vanneihna zawng zawng chang bik lo mah se an khel tha thei hle a, Les Bleus te luahlanin pathumna an ni mek. 
Argentina hian March ni 31 leh June ni 23 khan match hnih chiah khelin an chak ve ve a ni. An match hmasa zawkah European champion Italy chu si thum faiin 'Finalissimo' ah an hneh a, friendly match-ah Estonia chu si nga faiin an hneh leh bawk. 

Italy nen an inkhel tum hian Messi chuan assist tum hnih a nei a, Estonia laka an goal zawng zawng hi ama thun vek a ni thung.

#4 France - 1764.85 points
World Cup hnuhnung ber chawitu France hian point 25 hloh-in pali-na an ni a. List a lang pha zinga point hloh tam ber an ni bawk. Pathumna atangin point 1764.85 neiin an tlahniam a ni. 

Didier Deschamps-a pawl te hian March leh Junr thla inkar khan Nations League match li an khel a, chak an nei miah lo. Croatia leh Austria an draw hram a, Denmark leh Croatia lakah an tlawm thung. 

#5 England - 1737.46 points
An rank hnuhnung ber aiin point 24.25 in an tlahniam a, tun hnaiah England team enkawltu Gareth Southgate leh a nauten buaina chhete an tawk.  

Point 1737.46 neiin panga-na chu la luah phak tho mah se thun hnaia an inkhelh dan leh an result-ah lung a awi famkim zan lo. 'FIFA Men’s World Ranking' hnuhnung ber hnu khan England hian international match vawi li (Nations League vek) an khel a, mak tak maiin chak an nei miah lo. Tum hnih tlawmin tum hnih an draw hram a ni. 

Top 10 a lang ram  dang te chu:
#6 Spain - 1716.93 points
#7 Italy - 1713.86 points
#8 Netherlands - 1679.41 points
#9 Portugal - 1678.65 points
#10 Denmark - 1665.47 points