Infiamna zinga hlauhawm ber pakhat bike intlansiak hi infiamna zingah chuan a lar chakin ram hrang hrang mipui hlut a hlawh hle a, Thailand mi motoGP rider an awm lo chungin, 2018-a Thailand Grand Prix kha a hmunah mi 100,000 zetin an en.  

Bike intlansiak inelna zingah MotoGP hi a sang ber a, he hmuna dawhsan lawn zing leh chawimawina nomawi chawi zing te pawh hi an larin ngaihsan an hlawh em em thin. Kum 71 zet liam tawh atang khan bike intlansiak inelna hi kalpui alo ni tawh a, ram hrang hrangah lar chho zelin tunah phei chuan khawmualpui 5 zetah neih thin alo ni ta reng mai. Rider tam tak awm tawhin chung zinga ropui zual mi panga te chu kan tarlang dawn a ni.
 
MotoGP-ah hian Spanish leh Italian rider te an langsar thin hle a, vawiin ni thlengin motoGP awptu an la ni. Britain leh United State pawh hian rider pangai ve tak chu an rawn nei ve leh zauh thin. MotoGP hian milar a siam chhuah rualin chung milar te avang chuan motoGP pawhin mi ngaihhlut a hlawh phah hle tih chu Valentino Rossi leh Casey Stoner te vang pawh hian a hriat mai awm e. 

1949 khan ram 6 atangin rider 26 fuan khawm tena bul an tan atanga tun thlenga rider ropui zual 5 te chu:

5. Eddie Lawson
Eddie Lawson hi American zingah chuan MotoGP khalhtu thiam leh lar ber a ni awm e. 'Steady Eddie', an tih mai Eddie Lawson hi US-a motorcycle racing tilartu hmasa a ni. American tam zawk hian AMA Racing Championship atangin bul an tan thin a, Lawson-a’n 1983-a MotoGP team, Yamaha a zawm atangin he inelna rothapah hian an zuang lut ve ta chauh a ni.

Bike khalh thiam ta na na na chu, kar lovah Lawson chu a invawrh sang thuai a. 500cc khalh chhovin a kum leh 1984 chuan World Championship title a la ta der mai,  American zinga a hmasa ber dawttu a ni.

500cc class-ah Lawson hian 1986 leh 1988 khan title a lak belh leh bawk. Team dang zawmin 1989 khan title pakhat a lak belh leh bawk. Title 4 nen kum 1992 khan bike intlan- siak chu a chawlhsan ta a ni.

4. Mike Hailwood
A pa tuina ber bike racing-ah zuang lut vein nuam a tichho nghal hle a, a pa hi indopui II-na hunlai khan bike intlansiaknaah a lo tel ve zak zak tawh thin a ni. 'Mike the Bike' an tih mai thin Mike Hailwood hi 60’s chho vel kha chuan bike khalh thiam lar ber pakhat a ni. 

Hailwood hian a el puipa  John Surtees dungthulin Formula 1 te an luhchilh ve zawk zawk a, 1961 khan Hailwood hian bike intlansiak-a a hming dai tawh ngai lo turin kar khat chhung leka neih Isle of Man TT race-ah ropui taka inlanin category thum (125cc, 250cc leh 500cc class)ah a champion vek. 1962-ah Team MV Agusta lam zawmin 500cc World Championship-a tum 4 champion zawn thei hmasa ber a rawn nih ta nghe nghe. 

4. John Surtees
John Surtees hi MotoGP leh F1 World Champion nithei awmchhun a ni a, MV Agusta a khal thin a ni. British rider hi Italian fans hovin 'iglio del Vento' tih nickname an phuah sak a, a awmzia chu ‘Virthlileng fapa’ tihna a ni. 

Surtees hian bike bikah chuan category hnihah chauh ropuina a hlawh chhuak a, mahse motorsport hrang hrangah sulhnu a ngah hle thung. Kum 1956, 1958, 1959 leh 1960-ah te 500cc Champion niin 350cc class-ah kum 1958, 1959 leh 1960 te khan title nomawi a hum haw bawk.

1960-ah motorcycle racing atangin Formula 1 lamah a zuang lut a, 1964 a her chhuah meuh chuan Team Scuderia Ferrari atangin Formula 1 World Champion a rawn ni leh thei der mai. MotoGP Championship leh F1 Championship-a title la kawp thei hi amah lo midang an la piang leh lo. 

3. Marc Marquez
Spaniard Marc Marquez hi list a lang phak zingah chuan a naupang ber bakah tunah pawh a tithei pawl tak a la ni mek. 'The Ant' tia hming lem an phuah sak hian MotoGP-ah kum 6 chhung vel chu ro a rel ve tawh a ni. 

Championship class hrang pathuma champion thei mi pathum zinga pakhat Marquez hian kum 15 mi lek a nih laiin 2008 khan 125cc class-ah bul a tan a, a hnu kum hnihnaah chuan 125cc Champion niin Moto2 class-ah kum  2011 khan a kai sang chho a, chumi kum vek chuan a champion leh nghal thei a ni ni. Moto2 Championship lama ro a rel leh hnu hian 2013 khan MotoGP lamah lut chho lehin Team Repsol Honda a zawm.

Moto2 atanga MotoGP  a insawn chho kum hian title a la nghal pang a, hei hian MotoGP Champion thei naupang ber a nih tir bakah Kenny Robert-a hnu a MotoGP season hmasa bera title la leh thei hmasa ber a ni bawk. 

2014 khan title a lak zawm a, kum khat awlin 2016 leh 2017-ah a champion leh bawk. Marquez hi 2018 khan Riders’ Championship-ah 5-na a ni phak hram a, bike accident vangin a inhliam bawk nen kum a hmang tha chho vak lo. Mahse, tunah kum 30 bawr chauh a la ni a, hma hunah hun eng tak a la nei a ni.  

2. Valentino Rossi
MotoGP ngaina te chuan ‘The Doctor' Valentino Rossi hi hrelo an awm awm love. Khawvel-a bike khalh thiam lar ber ti ila kan sawi sual tam lovang. 

Rossi hi kum 21 chhung zet MotoGP inelnaah a tel a, class hrang pathum-a champion vek thei mi pathum zinga pakhat a ni. Kum 2000-ah MotoGP luhchilhin , thla hmasa mai khan a chawlhsan chauh. Bike racing a tel chhung hian lawmman dawngtute dawhsan (podium) ah tum 198 a chuang kai a, amah ang renga lawn kai zing an awm lo. 2002 leh 2004 inkar khan Rossi hi podium-ah tum 23 a lawn kai a, a point belh khawm chu 5092 niin he a point hmuh hi khum thei an la awm lo. 

Rossi hian Team Repsol Honda a khalh lai 2001, 2002 leh 2003-ah te title a la a, Yamaha lamah in sawn chhuakin 2004, 2005, 2008 leh 2009-ah te champion lehin MotoGP title 7 ngawt a la thei a ni. 

1. Giacomo Agostini
MotoGP chanchin-a mi hlawhtling ber Giacomo Agostini hian Grand Prix-ah dawhsan tum 122 zet a lawn a, 350cc and 500cc class-ah World Champion vawi 15 a ni thei awm chhun leh la tam ber a ni bawk. A record ropui hi khum a harsa tawh viauin a rinawm.

70’s bawr chho kha chuan amah ang reng a bike khalh thiam hmingthang an awm lo. He Italian pachal, a hming lema 'Ago' tih an phuah sak hian 500cc class bikah rider Championship title tum 8 chawiin race 68-ah a chak. 

Kum 1966 leh 1972 inkar khan Team MV Agusta khalhin a zawnin 500cc-ah kum 7 chhung a chak zawn a, 500cc title a lak hnuhnun ber chu 1975 kha niin Team Yamaha-a a awm tawh hnu a ni.  1968 phei kha chuan Agostini hi, season khat chhunga race awm zawng zawngah chakna a chang fai vek a. Kum 12 chhung teh meuh chu season khatah tum khat tal a chak ziah bawk a, hetiang record nei chu a amah lo chu Spaniard Dani Pedrosa chiah a awm. 

Intlansiak a chawlhsan hnuah Team Yamaha manager hna a thawk zui a, manager a nih chhungin rider ropui tak tak Eddie Lawson, Graeme Crosby leh Kenny Robert te a enkawl chho a,  Lawson leh Roberts te phei chuan world title an la thei a ni.