DOWNLOAD OUR APP

Read latest news on your phone
app-store

Khawvel footballer goal thun tam ber C. Ronaldo

Mar 27, 2022

Veng leh veng, khua leh khua inkhelhah pawh hian goal thun hi chu a har viau thin. Mahse, football thiam bik te hi chuan an lo thun thei fu mai. Man United icon Cristiano Ronaldo chuan Josef Bican-a record chelh lai chu khumin a elpui ber Lionel Messi leh player dang tha tak tak chungah a leng. 

Man United icon Cristiano Ronaldo chuan Josef Bican-a record chelh lai chu khumin a elpui ber Lionel Messi leh player dang tha tak tak chungah a leng. 

Cristiano Ronaldo leh Lionel Messi te pahnih hian kum 30 an chuang ve ve tawh a, chutichung chuan goal an la thun reng thei a, an pahnih chungchangah hian tunge ropui zawk tih inhnialna a awm reng bawk. 
    Manchester United star Ronaldo hi Old Trafford lama a kir leh hnuah pawh goal thun lamah a mikhual chuang lo va, goal 805 a thun hnuah record ropui siamin goal pawh a thun belh leh nual tawh a, a la thun zel pawhin a rinawm. 

Ronaldo hian a coach Ralf Rangnick-a hnuaiah a la tar loh zia leh goal thun thei bik a ni tih a lantir zel a, Old Trafford-ah hian a lal ram a zauh belh zel dawn niin a lang.  Tottenham nen an inhmachhawn tum phei chuan hat-trick a siam hial a nih kha.             

United tan bik ringawt pawh hian goal 136 thun tawhin Real Madrid tan goal 450 a thun a, Juventus tan season hnih chhung lekin goal 101 zet a khung bawk. A ram Portugal tan goal 115 leh Sporting tan goal 5 a thun a, professional footballer zingah amah ang renga goal khung thei hi khawvel-ah an la piang lo. 

Tunah hian ram tana goal khung hnem ber a ni mek a, Ballon d’Or dawn tam lamah Messi phak lo deuh mah se goal thun kawngah na na na chuan a khum chiang vai vai hle. Ronaldo hian Austria-Czech icon Josef Bican khumin nikum lam khan goal thun tam ber a ni tan a, goal thun kawnga amah han khum thei tur hnaivai deuh zingah tuna football la khel mek a elpui ber Messi-a bak han engto em em tur an awm hran lo bawk.

Goal khung tihah hian FIFA lamin an pawm leh hriat pui tournament lian tham lo chu chhiar tel a ni ngai lo. Tunah chuan Portuguese superstar hming hi a langsar rih hle a, khum mai pawh a har viauin a rinawm. Messi pawh hi a duai bik vak chuang lo va, legendary Ferenc Puskas leh Pele te pawh season hmasa khan rawn khum ve tawhin all-time chart lamah 4-na a hauh mek. Mahse, Ronaldo erawh a la phak rih lo hle thung. 

Goal khung tam top ten list chu i han en dawn teh ang:

10. Tulio Maravilha
Goal : 575 (A game khelh zat a hriat loh) 
Khelh hun chhung : 1988-2019
   

Brazilian hian football a khelh hun chhungin club hrang hrang 40 zetah a khel kual hman a, goal khungtu ropui a ni a, chutihrualin a game khelh zat tak hi record hmuh tur a awm lo hlauh.

9. Uwe Seeler
Goal : 575 (A game khelh zat a hriat loh)
Khelh hun chhung : 1953-1978
   

German mi niin Hamburger club tan a hun tam zawk a hmang a, Ireland club Celtic tan goal hnih khat chu kum 1978 khan a thun ve bawk.

8. Ferenc Deak
Goal : 576 (A game khelh zat a hriat loh)
Khelh hun chhung : 1940-1957
   

A vanglai chuan Hungary ram hmachhuan ve ber niin khawvel hupah a hming langsar vut lo mah se an ramah chuan footballer a ni anga hming thang an awm bik chuang lo. 
   

Szentlorinci AC tana a khelh lai chuan game khata goal 3 zel khung anga ngaih a ni. 

7. Gerd Muller
Goal : 734 (Game 793)
Khelh hun chhung : 1962-1981
   

He striker goal thun zinga pawimawh leh a hmingthan pui ber chu 1974 World Cup final, Munich khawpuia Germany-in Netherlands 2-1 a an hneh tum kha a ni awm e.
   

Muller hi ram tan mai bakah a khelhna club Bayern Munich tan goal a thun tam ber lawr laka, amah hnaih bertu aiin a let hnih zetin a thun tam zawk a ni.

6. Ferenc Puskas
Goal : 746 (Game 754)
Khelh hun chhung : 1943-1966 
   

Hungarian icon Puskas a hmingchawi hian kum tin goal mawi ber award ngaihhlut tak sem thin a ni. Budapest atangin a hming a chher tan a, a hnuah Real Madrid tan ropui takin a rawn khel leh.

5. Pele
Goal : 757 (Game 831)
Khelh hun chhung : 1957-1977
   

World Cup winner tum 3 zet ni tawh Pele hi khawvel footballer zinga ropui ber pakhat a ni. Pele hi a game khelh apianga goal khat khung ziah anga ngaih theih a ni.  Santos club tana a khelh laiin goal 656 thun angin record a ni a, a vai thu chuan goal 1,000 bawr thun ang hiala sawi a ni.
   

A goal thun zinga za tel teh meuh hi chu tour emaw friendly match-a a thun te an ni bawk. 

4. Lionel Messi
Goal : 759 (Game 961)
Khelh hun chhung: 2003-present
   

Legend dik tak tih ngam  Messi hian chawimawina chhiar sen loh a dawng tawh a, chung zingah chuan fooball award ngaihhlut ber Ballon d’Or award pasari ngawt a tel.         Barcelona lamah ropui taka a chet hnuah a goal thun te belh chho zel turin PSG a pan a, Argentine hian kum hnih kum thum chhung chu a record belh chhan nan hian goal a la khung theiin a rinawm. 

3. Romario
Goal : 772 (Game 994)
Khelh hun chhung : 1985-2007
   

Kum 1994 World Cup-a  Brazil champion puitu Romario hi thangthar lam chuan kan hmelhriat lo mai thei. Kha World Cup-ah khan goal 5 lai a khungin player of the tournament-ah an thlang a nih kha. 

2. Josef Bican
Goal : 805 (Game 530)
Khelh hun chhung : 1931-1956
   

Game 217 khelha goal 395 zet thun thei Bican hi player naran a ni lo. Slavia Prague club fachuam Bican hian khawvel footballer goal khung hnem ber record kum 60 chuang a chelh  thei a ni. 
    An sawi dan chuan Bican hian football a khelh lai hian goal 1,500 zet a thun niin an sawi a, mahse chung zinga goal 805 chauh chu FIFA lamin an pawm pui (recognise) thung. 

1. Cristiano Ronaldo
Goal : 807 (Game 1110)
Khelh hun chhung : 2001-present
   

Manchester United, Real Madrid, Juventus leh Red Devils tana khel kual tawh Ronaldo hi a kalna lam apiangah a hlawhtling em em zel thei. Tunah pawh net hmaa player hlauhawm ber pawl a la ni phak a, a record ropui hi amah bawkin ala khum chho zel dawn niin a lang. 
    Ronaldo goal thun hi chhinchhiah danin goal 807 a ni mek. 

Share now