Football hi, khawvel a sport lar ber niin player te zingah khawvel pum huap a milar leh ngaihsan hlawh pawh an awm nuk reng a ni. Kum zabi 21 chho hian mi tam takin pawisa peipuina hmanruahah hmangin dollar tluklehdingawn teh meuh an khawih che vel mek a. Hengte vang hian kum tina player te hlawh tam uchuak leh transfer-naa an sum hman zo zaite pawhin min thawng meuh tawh lo. 

Footballer tam zawk hi chu an vanglaia an sum lakluh te hi thiam taka an hmang chuan an damchhung let tam hman daih sum an hui lut a, thil danga sum hai lut tawh kher lo pawhin khawsak nawmna tling an chawlhpui thei a, theinkhat phei chuan mahni sum dawnna leh thiam zawng hmangin sum an thawkchhuak chhunzawm reng bawk. Club atanga an sum hlawh chhuak bakahah footballer eng emaw zat chuan investment te, real estate leh sponsorship deal atang tein sum thahnem tak an rut ve reng thin bawk. 

Kum lianta chhung khan footballer thahnem tak te sum a pum laiin thenkhatin an hloh thung a, chungzinga hming langsar Neymar, Messi leh Ronaldo te chu nikum lama an dinhmun sawhsawn lovin sum ngah zingah an la lang phak a ni. 

2021 kum-a footballer sum ngah zual te chu:

10. Thierry Henry - $130 million
Hranghlui Thierry Henry hi Premier League player ropui ber zinga mi niin, Arsenal tan ropui takin kum riat chhung zet a khel a, Premier League Golden Boot award tum 4 dawng tawhin amah ang renga dawng tam an la awm lo. 2014 khan inkhelh a chawlhsan tawh a ni.

A vanglai chuan Henry kha infiammi hlu leh sumdawnna khawvela hralh kal ber zingah a tel phak a. Sport brand lar tak tak Nike, Reebok leh Puma te nen thawk hovin sum tam tak an siam a, FIFA leh PES video games-ah te telin Gillette leh Beats headphones brand ambassador a ni bawk. Henry hi Belgium, assistant coach niin a football khawvel a la hmang zui zel. 

9. Gareth Bale - $145 million
    Footballer dangte sum lakluh a tlakhniam laiin Gareth Bale erawh a pung hret a, Real Madrid star hi pakuana atangin pariatnaah a kai chho a ni. Welshman hi khelmual lamah team tan thawhhlawk lutuk tawhlo mahse, a hlawh tam em avangin a sum neih hi a pung chho zel a, Bale hian kum tin Real Madrid atangin dollar maktaduai 33 (cheng 2,451,900,000) a hlawh a ni. Bale hi Adidas, Lucozade, EA Sports leh BT Sport te nen an thawk ho bawk a, Instagram-a sponsored post atangin kum tin cheng nuai 100 chuang a lalut reng bawk. Bale hian Real Madrid tan Champions League title pathum a chawi tawh a ni.

8. Ronaldo - $160 million
    Kum 2000 chho vela football en hman chuan Ronaldo Nazario kha kan la hre reng awm e. A vanglaia khawvel forward tha ber Ronaldo khan Ballon d'Or pawh tum hnih a dawng a, Barcelona leh Inter Milan a zawm tumin khawvel player manto ber record siam ve ve thei khawp a huhang ngah a ni. A lar zia hriain Nike chuan thawh puiah sawmin kum 10 atan contract an ziak a, a hnuah $180million zetin damchhunga thawk dun turin an inrem leh nghe nghe.

Ronaldo hi Snickers and Pirelli te nen an thawk ho bawk a, amah nena thawk dun tura company tam tak an inkau mek laiin, kum 21 mi lek a nihin khup hliam vangin a ropui tur angin a ropui chhuak zui thei ta lova, sum tam tak a lalut tura a hloh phah a ngaih a ni. 

2018 khan Ronaldo hian Spanish club Real Valladolid-ah chanvo thahnem tak neiin sum thahnem tak a lalut bawk..

7. Wayne Rooney - $170 million
    England leh Manchester United superstar Wayne Rooney hi Old Trafford chhul chhuak niin a club tan trpohy 16 lai a chawi a, chung zingah chuan Premier League title panga leh Champions League a tel a ni. Rooney hi United tana goal thun tam ber nihna hauh mektu a ni mek. 

A vanglai pelh hnuah Rooney hi MLS lamah kalin kum kat chhungin $30m a la hlawh phak a ni. Nike, Nokia, Coca-Cola leh Ford te nen an thawk ho thin. Rooney hian sponsorship bakah real estate atangin sum thahnem tak a lalut bawk. Ballboot a khai hnuah manager niin Championship club Derby County a enkawl leh mek a ni.

6. Zlatan Ibrahimovic - $190 million
    Thin chhiat leh inkhelh thiam vanga lar Zlatan Ibrahimovic hi Europe club lian tak takah a khel kual tawh a, a kalna apiangah ropui takin a khel zel thei a ni. 

Sweden mi Ibrahimovic hi khelmual chhunga a hlawhtlinna vangin sum a hui lut hnem hle a, 2004 leh 2014 inkar khan striker ropui hian Nike nena an thawh dunna atangin sum thahnem tak a lalut a, 2016-a sportswear brand thar A-Z a tihchhuah hnu khan brand dang tan a thawk zui tawh lo. 

A ram Sweden tana goal thun tam ber nihna hauhtu hian Nivea, Xbox leh Vitamin Well sports drink te atangin sum thahnem tak a siam chhuak bawk. An ram car siam chhuah Volvo car tilar turin Ibrahimovic hi an hmang mek. Kum 39 mi ni tawh chungin tunah hian club hlun AC Milan player zinga hlawh hnem ber ala ni mek thei. 

5. Neymar - $200 million
    Neymar hi footballer zingah sum tuakna tha ber zinga mi a ni mek a, he Brazilian hi a inkhelh thiam piah lamah a zei leh hmelthat vangin Santos tana a khelh lai atang tawhin company ho mit la thei hle. Khawvel-a player manto ber hian a club khelhna Paris Saint-Germain atangin hlawh thahnem tak a neih piah lamah endorsement atangin kum li chhungin $40m zet a lalut a, tunah hian German sportswear siamtu lian Puma ambassador a ni mek a, Heng bakah hian brand lar Panasonic, Volkswagen, Claro, Unilever leh Santander ten an hmang mek a ni. Kum 2025 thleng PSG nena thawh hona thuthlung nei Neymar hian, sum tha hnem tak a hui lut zel dawn niin a lang.

4. David Beckham - $450 million

Khelmual chhung atanga khawvel pum huapa lar chho ta, Beckham-a ang renga nula leh sumdawng te mit la hi footballer zingah an awm kher awm love. Inkhelh chu a thiam ngei a, mahse khelmual chhunga a inkhelh thiamna aimahin a larna leh a huhang hian sum lak luh lamah chuan a pui nasa zawk mahin a hriat. He sap pachal hian a nupui Victoria nen sumdawnna hlawhtling tak an din a, an hausakna a pung chho mek zel a ni. 

A vanglai khan Pepsi, Calvin Klein, Adidas leh Gillette te nen thawk hovin sum thahnem tak a lalut a ni.

LA Galaxy tana kum ruk a khelh chhung khan a hlawh bakah $255m vel lalut anga chhut a ni. Beckham hi real estate lamah pawh inhmangin US leh England atangin sum thahnem tak a hai lut. MLS team Inter Miami hi Beckham-a ta niin, Manchester United-a a teammate 'Class of 92' te nen Salford City an intawm bawk. 

3. Cristiano Ronaldo - $500 million
    Cristiano Ronaldo-a lar leh inkhelh thiamzia thu chu kan hre vek awm e. Rawlthar tumruh tak Ronaldo hi Sporting Lisbon atang Manchester United a zawm hnuin larna leh sum chuan a zui zel a, khawvel footballer ropui ber zingah sawi hmaih a ni ngai tawh lovang. 

Ballon d'Or tum nga dawng tawh hi international football-a goal thun tam ber a ni mek bawk. Juventus star hian Champions League nomawi tum nga chawi tawhin record ropui a chelh nual bawk.

Mual chhung piah lama a nun hmandan entawn tlak tak Ronaldo hi, Nike, Herbalife leh Clear Shampoo te nen an thawk ho mek a, 2016 khan Nike nen thawh hona $1 billion man hu ziakin signing bonus ringawt pawh $100m lawih a hum haw. A mimal brand leh a sumdawnna hrang hrang vang hian $1 billion club lama lawmluh a nih thuai ringtu an thahnem hle. 

2 Lionel Messi - $600 million
    Lionel Messi hian kum lian ta thla 12 chhung khan sum a hui lut hnem hle a, nikum khan Messi hi pa 4-naah awmin a sum neih hi $400m anga chhut a ni a, kumin hian million 200 zet a pungin  hmasawnna nasa tak changin pahnihnaah a in vawrh chho nawlh mai. Brand hrang hrang nena an thawh ho bakah PSG-a a hlawh tur ringawt hi kum khatah tax pek vek hnuin $40m bawr a ni. 

Ballon d'Or tum ruk dawng tawh Messi hi kum 2006 atang khan Adidas-in a sponsore a, infiamna thuam siamtu lar nen damchhung daih thawhhona an neih bawk. Infiammi zingah Messi hi fakna atanga sum lalut tam ber a ni mek. 

1 Faiq Bolkiah - $20 billion
    Thlahtute sum a rochun vanga hausa mah nise, Faiq Bolkiah hi khawvel-a footballer hausa zinga chhiar hmaih chi a ni lo. A rosum neih tam uchuak lutuk hi player dang te nena khai khin chi a ni lo hial zawk. Kum 23 mi hi Brunei Lal Hassanal Bolkiah vahpa hi 2019 khan kum khat atan Southampton youth academy a zawm ve a, Mahse, he midfielder hi a club tan first team-ah a inlan phak lo thung. Saints a chhuahsan hnuah Bolkiah hian Arsenal leh Chelsea youth team te a zawm ve leh.

A professional contract hmasa ber chu Leicester City-ah hmangin nikum thleng khan a khel a, vawikhatmah Foxes senior level-a inlan lovin free transfer-in Portugal club Maritimo a zawm leh. Brunei national team captain hi Maritimo reserve team-ah a khel mek a ni. Khelmual chhungah hlawh hlinna leh sum hailuh tam neilo mahse, kum tam tak chhung chu professional footballer hausa ber nihna a hauh chhunzawm zel rihin a rinawm.