Khawvel footballer lar selfish zual 5

Admin - Nov 07, 2021

Player thiam zual thenkhat te erawhin mahniin an bei

 Mizote tlawmngaihna kawnga kei kei ti lova, nang nang tih thin ang deuh khan team a khelh ngai football khawvel-ah pawh kei tih hi a rem ber thin lo. Team chakna turin lungrual takin player te an thawk ho thin tur a ni. Player thiam zual thenkhat te erawhin mahniin an bei a, selfish deuh thin mah se, goal an khung theih thin avangin an hming chhiatna tam tak an hliahkhuh leh zawk fo thin.

A technique leh a tlan chakna te larpui viau thin a, thangkhat lian chhung zet chu Bayern Munich player pawimawh a ni chungin Arjen Robben hi Bayern player selfish ber zinga chhiar tel a ni. Amaherawhchu, amah chauha goal thun tum erawh a ni bik lova, Bavarian legend hian goal pawimawh tak takah assist a ngah ve hle a ni. 

A veikhawr vangin a ke ding lam a hmang thiam lova, ding lam zawnga ball a kualpui tumin a thian te pe ta mailo chuan amahin tih goal a tum ta thin a, hei tak hi sawisel a kaina lai chu a ni. 2012 khan amah Robben chuan interview naah,"Selfish hi quality siamtu a ni" a ti daih thung. 

Player selfish te hi dribbling leh attacking lamah tha viau thin mahse, an selfish vang hian team-in a tawrh phah theih bakah team inlungrualna a tichhe thei a ni. Player selfish 5 thlan chhuah te chu: 

#5 Vinicius Junior | Real Madrid
    Real Madrid forward Vinicius Jr. hi player selfish taka sawi nimahse, footballer tana pawimawh quality tha zawng zawng chu a nei deuh vek hial awm e. A insiksawih thiam dan te, a tlan chak leh ball thiam dan zawng zawng hi leh lam pawl te buaina tham a ni. Mahse, Vinicius hian a thiante a hun takah a pe thin lova, a thiante tih goal ngei tura ngaih pawh a huna a pek thin loh vangin goal-ah an chan loh phah fo. Dribbling leh shot velah chungchuang hle mahse, team tana a thawh hlawk tawk loh vangin player mahni hmasial anga hriat a nih phah ta ni. 

Vinicius hian tun season La Liga bikah Real Madrid tan goal shot tum 75 zetah goal thum chiah a thun thei a ni. Mahse, net puar pawp a pet tum ta ngar ngar chu Champions League lamah te chetha chhoin goal hnih lai a thun belh a, Brazilian hian tun season chhungin game 14 a khelh tawhah goal kua thun tawhin assist s 14 games this season.

#4 Zlatan Ibrahimovic | AC Milan
    Player sual tia hriat hlawh laklawh Zlatan Ibrahimovic hian Paris Saint-Germain a awm chhung khan a hun tha leh midang tana a thawh a tam ber hial awm e. 2013-2014 season chhung khan league bikah ringawt pawh assist 15 zet a nei ve a ni. Mahse, tunah chuan khatiang kha amah atangin beisei tur a awm tawh lo. Mi siam sak ai chuan goal thun-in a rilru a luah tawh zawk.

Kum 40 mi hi a inkhelh hun hmasa lamah chuan striker hnunga ding thin leh playmaker anga awm thin a ni. Tunah chuan chungte chu a danglam vek tawh a, tunah chuan Ibrahimovic-a tan chuan team tana goal khung hi club a zawm chhan a ni deuh ber tawh thung. Zlatan Ibrahimovic hian 1999-a Malmo atanga bul a rawn tan atangin game 954 zet khel tawhin goal pawh 565 zet a thun tawh a ni. 

#3 Mohamed Salah | Liverpool
    Liverpool marksman Mohamed Salah hi tunlai chu amah rau rauah a form ber lai a ni hial mai thei. Premier League game kua lakah goal sawm thuin assist tum nga a nei der tawh a, tunlai chu dan theih loh khawpin a khel tha tih hial ngam a ni.

A club tana a chetthat rual hian a selfish-na a tih lan thin hi Liverpool tan tute sawi a tling thung. Premier League lamah Salah hian game tinah vawi li vel goal shot ziah anga chhut a ni a, a shot vawi li a vawi khat hi goal zel anga ngaih a ni bawk. Heng a goal shot tam zawk hi chu a thian goal thun turin siam sak zawk se, goal ngei tura ngaih an ni hlawm. 

Mohamed Salah hi mahni hmasial tak a ni a, hei hian tunlai forward hlauhawm ber a nih tir a ni. Tin, Liverpool hmatawng pathum te hi mahni hmasial leh hmasial loh kawngah an intluk tlang hle niin an sawi bawk. 

Kum reilote liamta khan Sadio Mane leh Salah te pahnih inkarah hian in pass duh loh vel thuah thawm thang hat a awm a. Egyptian international hian ball a ken luh laiin a kiang maiah Mane hi rawn tlan vein pass rem tak leh free takin alo insiamrem a, mahse Salah hian pass ta mai lo chuan goal lamah a shot ta zawk a, a pet goal lo nghe nghe. Hemi tum hian Mane chu a hrilhaiin a beidawn hmel hle nghe nghe a ni. Liverpool legend Graham Souness phei chuan,"Ka player hmuh tawh zingah Salah hi a la selfish ber awm e," a tih hial. 

#2 Cristiano Ronaldo | Manchester United
    Cristiano Ronaldo hi mual chhunga eng thlentu leh inpekna nena rim taka thawk thin tia hriat nimahse, a mimal lansarhna tur tel loah chuan a theihna tam tak hi a lanchhuah tir lo fo nia ngai an awm thin. Amah hi mahni hmasial, mahni indah pawimawh leh in dahhmasa ber ngar ngar thin nia ngaih a ni. Mahse, hetianga seltu tam takte hi Portuguese pa ropui hian a goal thun hmangin a beng dai leh fo thin. 

Ronaldo hi Real Madrid leh Juventus tana a khelh lai khan minute 90 chhungin tum sarih bawr vel goal shot ziah anga chhut a ni a, chu a thil chin than chu Old Trafford lamah pawh hian a chhawm leh ngeiin a rinawm. Hemi kawngah hian pundit leh a player pui ngei ngei te pawhin Ronaldo hi an sawisel fo tawh thin a ni. 
Juventus player a nih lai khan player te sawisel fo thintu Antonio Cassano chuan,"A selfish em em reng a, midangte pet goalin amah awmzia a neih loh vangin amah chauhin pet goal a duh thin. Football tana nung nilovin ama tan, ama goal thun tur tan chauha nung a ni," a ti hial. 

#1 Neymar | Paris Saint-Germain
    Neymar hi ball a thiam em avangin Santos lamah a khelh lai atang tawhin mi mit fukna a ni a, European club lama a khelh hnu pawhin a thiam a theihnghilh lo. Chutihrual chuan, Barcelona lama a khelh dan leh PSG lama a chet dan chu a danglam hle tawh thung. 

Neymar hian Barcelona-a a khelh lai khan South American style-a khelhin Lionel Messi leh Luis Suarez te thiamna ti kalhkimtu kha a ni chiang a, mahse French lama an fans leh pundit le erawh an hrethiam thei lo. Brazilian international hi hnial rual lovin khawvel player tha ber zing ami a ni mek a, mahni insiam chawpa goal ropui tak tak thun pawh a ngah reng a ni. Mahse, a ball chang rei leh a selfish-na hi a teammate te mai bakah thlirtu leh pundit te beidawnna siamtu a ni fo thei thung. 

Thla liamta mai khan Neymar-a hmasial lutuk chungchangah Kylian Mbappe chuan Idrissa Gueye hnenah complain a siam a, he thu hi a hriat rualin PSG manager Mauricio Pochettino chuan player pahnih te chu ko vin inremna a siam sak hial a ni. 

Share now