Otober 2, 2023; Nimin Pathianni chawhnu inkhawm ban a chief minister Zoramthanga bial fang chu, Chin State Zohnathlakte tana a hmalakna a an lawm zia entir nan hnam puan an lo bahtir. 
 
Hemi chungchang hi a official IG page a tarlangin, chief minister chuan, "Vawiin Pathianni chawhnu inkhawm ban khan ka bial chhung ka tlawhnaah ka beisei loh deuh maiin Pu Sawmthanga, Zemabawk (Vice President, Zomi Innkuan) te chhungkua chuan Myanmar ram buai avanga Chin State-a Zohnahthlak buai, mangang leh harsatna tawkte kan theih tawka kan lo tuamhlawmna leh kan tanpuina avanga an lawmna entir nan hnam puan mawi tak mai min lo bahtir a, hlu ka tiin lawmawm ka ti tak zet a ni," tiin a tarlang.

CM chuan, MNF chu thuthlung neia kal, kan ram leh hnam, kan sakhua leh kan hnam tihphungte vawnghima venghim tura ding an ni tih tarlang bawkin, "Sawrkar laipuiin kan unau raltlante laka biometrics collection kalpui tura min tihna pawh kan unaute lakah chi inthliar hranna (discrimination) anga ngaih theih a nih avangin kan kalpui ve theih loh thu kan sawi tawh a nih kha, khawvel hmun hrang hranga Zofate tan kan ding zel dawn," tiin a tarlag bawk.