Khawvel huap badminton tournament-ah Mizo rawlthar, C. Lalramsanga’n bronze medal a la a, Lalrempuii’n quarterfinal a thleng pha bawk.

Hyderabad, Telengana-a Thawhlehni atanga Kotak India Junior International Series 2024-ah Durtlang rawlthar, Ramsanga hi Under-19 Mixed Doubles-ah inlanin a kawppui, Pragati Parida-i nen bronze medal an la a ni.

Mission Veng Badminton Club-a khel lai, Ramsanga leh Parida-i hian Round of 32-ah NS Chauhan & Liza Taank te hnehin Round of 16-ah Aditya Tripathi & Krisha Soni te inkawp an hneh leh.

Semifinal luh inchuhnaah Mizo inhmachhawnin Ramsanga te thian dun hian Arsh Mohammad leh Rempuii te inkawp chu 10-21, 21-18, 22-20 in an hneh a. International level badminton tournament lian quarter final-ah Mizo player an intum hmasak ber a ni nghe nghe.

Semi final-ah hian Ramsanga te hian he tournament-a Seeded No. 1 Thailand mi, Attawut Sreepeaw leh Pannawee Polyiam te tangdun chu an hneh ta lo va. Game hmasa berah 22-20-in chak mah se game hnihnaah 21-14-in an chak lo va, deciding game-ah 18-15-a hma hruai hmanin dinhmun tha zawkah ding hman mah se 22-20-in an chak ta lo va, bronze medal-ah an lungawi a ngaih phah ta a ni.

Ramsanga hi Mizo zingah international level badminton tournament (junior)-a medal la thei hmasa ber a ni a, Mizoram badminton tan history a siam a ni.

Ramsanga bakah hian Serchhip tleirawl, Ralte Villa Badminton Club-a khel lai, Rempuii pawhin quarter final hial a thleng thei bawk a. International level tournament-a Mizoram tana medal la thei hmasa ber leh quarter final thleng thei an nei chu Mizoram Badminton Association (MBA) chuan ropui a tiin a chhuang tak zet tih an sawi a, an tournament khelh leh zel turah duhsakna a hlan bawk.

International level tournament hmachhawn tur dang

Thawhlehni atang hian Pune, Maharashtra-ah Yonex-Sunrise India Junior International Grand Prix 2024 khelh tan a ni dawn a, hetah hian Mizo shuttler pali an inlan zui dawn.

H. Lalthazuala chu Under-19 Men’s Singles-ah main draw a lut sa a ni a. Lalrinkimi’n Under-19 Women’s Singles-ah qualifying atangin a khel tan thung ang.

Ramsanga chu Telengana tournament-a a inlanna, Under-19 Mixed Doubles-ah Seeded No. 4-na an ni, Under-19 Men’s Doubles-ah a kawppui nen Seeded No. 6 an ni bawk.

Rempuii pawh huang hnihah inlan tur niin Under-19 Women’s Doubles-ah Seeded No. 4-na an ni a, Under-19 Mixed Doubles-ah main draw lut sa an ni bawk.

MBA chuan tournament lian hmachhawn tur kan Mizo shutter-te hi duhsakna sang ber an hlan tih an sawi.