ZALEN August 24, 2026: 7th Global Cancer Summit chu nimin August ni 23 khan Swatantra Bhawan Auditorium, Banaras Hindu University, Varanasi, Uttar Pradesh- hman a ni a, Health Minister Pi Lalrinpuii’n a hmanpui. Kumin summit thupui chu "Living with cancer in the 21st Century" tih a ni.

He hunah hian Lalrinpuii chuan, Mizoram chu India rama cancer sanna ber a nih avanga harsatna hrang hrangte a tarlang a. Zuk leh hmuam ti an tam avanga cancer chi hrang hrang a tam thu te leh hmeichhia chhul cancer venna HPV vaccine chungchanga hmalakna hrang hrang te a sawi a ni.

Health Minister chuan Mizoram-in cancer research centre a mamawhna a san thu leh, Mizoram hmasawnna tura cancer research centre changtlung zawk neih theih dan kawng awm se a duh thu a sawi bawk.

Health Minister chuan he summit a tel mi thiam tak tak te nen inkawmhona hun an hmang a. Central Sawrkar hnuaia ICMR leh Department of Science & Technology te nen ṭang tlanga Mizorama cancer hluar chhan zirbingna tur - Cancer Research Centre neih theih dan tur kawng dappui tura an inhawn thu Minister hi an hrilh a ni.

He summit-ah hian cancer natna chungchanga mi thiam sawm bikten paper presention an nei a. Cancer research lama hnuhma nei tha tak takte pawh an tel a ni.