• Vanglai nite: Nu leh pa tha tak Pathianin min pek karah kan lo pianga. Duat takin min enkawl a kan lo thang lian chho zel a. School-te kalin tleirawl/rawlthar kan lo ni a. Thawmhnaw, ei leh in, pocket money thlengin kan chhung ten min tum sak a. Engmah ngaihtuah buai tur awm lovin kan tleirawl lai hunte pawh chu kan hmang a. Lehkhate zir zelin puitling kan lo ni ve ta a. Hetih hunah pawh hian engkim mai ngaihtuah buai ngai lovin kan nu leh paten min pe vek thin. Engmah lungkham tur a awm lo va; tichuan, kan hunte chu nuam tak leh zangkhai takin kan hmang a ni. Tunlaiah phei chuan lirtheite min leisak a, a petrol man tur min pe leh bawk a, a hahdam hle mai. Lehkhate pawh duh tawk in kan zir thei a, a senso tur lam pawh lo in ngaihtuah ve vak a ngai ngai lo. A thente phei chuan nupui fanaute kan nei bawk a, chhungte ringin hahdam takin kan awm a ni.

A Her Liam Ta: Kum 30/40 kan han tlin meuh chuan kan chhungte/nu leh pate chuan mual min lo liamsan hawlh tawh mai a. Kan hlim lai nite chu a her liam ta, a thlawna kan hmuh thin zawng zawngte chu a lo tawp ta. Miin min hriat ve nachhhan kan chhungte an lo awm tak lovah chuan hmelhriat an vang ta duak mai. Chhung khat laina, unaute zawng zawng pawh an lo bo zo ta. Kalna apiangah tawngkam tha hmuh tur pawh a awm ta mang lo. Mamawhtu leh thian ngah tak thin kha tunah chuan a hawihai ta der mai. A thlawna ei leh in, damdawia inenkawlnate pawh chu a lo tawp ta. Tunah chuan eng pawh tawk se ngaihtuahawm tak a ni, chhantu nei lo vakvai ang mai a ni. Nite pawh chu a rei em em a, hahchawlhna tur pawh chu a awm ta mang lo. Han intihharhna tur lah a awm tawh lo, a chhan chu miin inlengah pawh an duh meuh lo. Tichuan, kan vanglai nite chu alo her liam ve, a lo ni reng mai.

Khawvel Thar Chu: Inthenawm khawvenna kawngah pawh uaptu awm thin kha tunah chuan an awm tawh lo va, mahni a inhaiven alo ngai ta. Khawtlang leh kohhranah pawh hmahruaitu nei thin kha, mahni a din ve a lo ngai ta. Ni tin eizawnna lamah te pawh uap thintu tel lo, mahni a chet ve chu alo tul ta. Inchhungkhur lamah te pawh mahniin rorel a ngai a, mahnia thutlukna siamte pawh a lo tul ta. Kalna apiangah chu khawvel-nu leh pa tel lo chu kan hmang tan ta a. Naupang ang mai ni thin kha tunah chuan puitling tak tak nih a lo ngai ta. Pathian ngaihsak vak lo thinte pawh kha tunah chuan nunna atana beih fe a lo tul ta. Incheinate pawh tun hma ang mai ni lo, up zawka tih a lo tul ta der mai. Ngaihthlak duh zawng leh hmuh duh zawngte pawh tihdanglam alo ngai ta. Chutiang zelin sawi duh zawng, kawm duh zawngte pawh fimkhur taka ngaihtuah thin a lo ngai ta. Nu leh pa tel tawh lo khawvel chu mahnia innghat fimkhur taka hun leh nun te hman, rin tur awm tawh loh avangin khawvel thar chu a lo ni reng mai.

Nun Nuam Nei Turin: Nun hlim, nun nuam chu engtin nge kan neih tak ang le? Kan han hlim dawn viau thin a; mahse, kan chau a, kan lungngai leh mai thin. A ni taka, zuk leh hmuamte hi kan uar lutuk a, hei hian kan hriselna dinhmun a tihniam a, chu bakah tul lova kan pawisa eiraltu mai mai a ni. Han sim hmak thei ila chuan, hnara hlit phawi ang huai a ni ngei ang le! Ei leh in chungchangah te pawh kan induat leh lutuk a natna benvawn tha lo tak tak kan neih phah thin a nih hi. Hla vak lovah pawh lirthei kan chelek zel a, chu ai chuan kea kal tamte hi han tum ta ila kan hlawkpui zawk ngei ang. Ei leh in thianghlimte hi ngai pawimawh ila, kan eina tur kutte pawh sahbawnin fai taka sil ching ve ta ila. Tichuan, hriselna tha tak kan nei thei ang a, kan nun a lo nuam ang. Pathian kan han ngaihsak leh phei chuan Chung lam tanpuina nen kan hunte chu hlim leh nuam takin kan lo hmang thei dawn alo ni reng mai. Mi lian leh awmthei deuhte ta emaw kan tih thin kha a nih chuan lohzia kan lo hre tawh dawn a ni.
Bible-ah chuan, “I nu leh i pa chawimawi rawh, nu leh pa anchhe lawh tu chu anchhe dawng in awm rawh se,” tih te kan hmu ang. Kan hre theuh ang a, heng vai kan tihhote pawh hian an nu leh pate an ngaihhlutzia chu, “Patling pui tawh pawh hi an hmaah chuan an ding zum reng thin,” an ti. Nia, Mizote pawn kan zahin kan ngaihlu hle a; mahse, tun hnuah erawh a dal ta deuh emaw ni chu aw, a tih theih. Mihringte chu kum hlun tur kan ni lo va, thi boral leh mai tur kan ni. Kan chenna khawvel erawh la awm reng tur a ni a. Keinin kan rochun ang bawkin nakinah kan tu leh faten kan awm tawh loh hunah khawvel thar - nu leh pate tel tawh lohna chu an la rochun ve zel dawn a ni. Khawvel thar duhawm tak an neih theih nan nang leh kei hian mawh kan phur, hma i la sauh sauh zel ang.