'Most Beautiful Woman in the World' list-ah Hollywood actress Jodie Comer chuan dinhmun sang ber a luah a, Deepika Padukone chu Indian zinga top 10-a lang awm chhun a ni bawk. List hi science thiamna hmanga tehna hrang hrang atanga an thlan chhuah a ni a, hmeltha kan tihdeuhte pawh kha an langlo a nih pawhin a mak hran lo mai thei. 

London-a awm plastic surgeon Dr. Julian De Siva chuan science thiamna atanga teha khawvela hmeichhe hmeltha ber ber a thlang chhuak thin a, kumina dinhmun sang ber luahtu chu English actress Jodie Comer hi a ni. Kum 29 mi hi an tehna atang chuan a sakruang kim tlang a fuh ber a, endikna hrang hrangah khum zo an awm lo.

Hnar nalh Jodie
'The Royal Today' star Jodie Marie Comer hi science thiamna atanga teh chuan a hnar a nalh hle mai a, a sei zawng leh hlai zawng pawh 100% deuh thawin a fuh. A hnar hi 98.7% laiin a dik a, sawisel tur a tlem hle tihna a nih chu. Chutih rual chuan a hmui, khabe leh a mit te pawh a fuh a, a hmai shape hrim hrim pawh a fuh vel vek a ni ber.

Dr. De Silva hian kum dangah pawh list hi a lo tichhuak tawh thin a, face mapping technique chi 12 hmangin an hmelthat dan hi a teh a ni. A teh zingah hian - mit, hnar, hmui, khabe leh hmai tlangte chu a en uluk zual a, Greek Golden Ratio of Beauty ‘Phi’ an tih hmanga tehnaah Jodie Comer hian 94.52% a hmu a ni.

Zendaya
Jodie Comer dawta point hmusang chu American actress Zendaya a ni a, model Bella Hadid aiin mark a hmu sang tlat mai! Kum 26 mi Zendaya hian 94.37% a hmuh laiin Bella Hadid hian 94.35% a hmu thung - an inthlauhna erawh a tam lo hle. 
Hmeltha palina chu American singer Beyonce (92.44%) a ni a, top 3 te nen an inkar a zau hret. Beyoncé hi Ariana Grande chuan a dawt a, a hnuaiah hian Taylor Swift, Jourdan Dunn leh Kim Kardashian te an awm. Kim Kardashian hnuai chiahah hian India chhul chhuak Deepika Padukone a awm a, 91.22% lai a score phak. South Korean model HoYeon Jung chuan top 10 a khar a, 89.63% a hmu a ni. 

'Most Beautiful Woman in the World' list hi khawvel hmun hrang hranga milarte atanga thlan chhuah thin a ni a, ngaihven pawh a hlawh viau zel a ni. 

Hmeltha zual 10 te chu 
1. Jodie Comer – 94.52%
2. Zendaya – 94.37% 
3. Bella Hadid – 94.35%
4. Beyoncé – 92.44%
5. Ariana Grande – 91.81%
6. Taylor Swift – 91.64%
7. Jourdan Dunn – 91.39%
8. Kim Kardashian – 91.28%
9. Deepika Padukone 91.22%
10. HoYeon Jung – 89.63%.