Tun hnai khan Mizo film OST hit zet mai pakhat a rawn chhuak a, YouTube lamah pawh en a hlawh cher cher hle. A hmingah pawh 'Kherawlai' tih ngat a ni a, September 30 hian Vanapa Hall-ah tlangzarh a ni dawn. 

Kuminah Mizo film eng emaw zat a chhuak tawh a, en man hla tak tak a awm nual. 'Kherawlai' pawh hi a boruak thlir chuan beisei a sang a, a rawn 'hit' ta viau a nih pawhin a mak lo ang. OST atang ringawt pawhin boruak a rawn siam nghal thei a, en chakawm tawh tak a ni. 

A script hi Muantea Khiangte ziah a ni a, kum 1970 chho velah min chenpui dawn a nih hmel hle. An director hi J.S Tharmawia a ni a, videography lama sulhnu nei tha tak Osiama Pictures chu Director of Photography (DOP) a ni - an kutchhuakin belhchian a dawl viau ang. Shooting hi Burma ram epa awm Zawngtetui khuaah an nei a, he khua hi in 50 bawr vel chauh an ni nghe nghe. 

'Chu mi kha mi film-ah khan a chang tawh' tih vel kha sawi tur a awm dawn lo - mi thar vek an ni dawn! An vawi khat channa a nih avang ringawtin lo hnual lo la, star thar an rawn chhuak lo ang tih tunge sawi thei? Mesa Varte leh Julie L Ralte te chu a changtunu leh a changtupa turte an ni a, Duhawma Hmar, Mpa Sailo, Vli Khelte leh Mci Ralte te pawh an pawimawh viau dawn. An film OST en tawh chuan acting an thiam zia chu kan hrethiam mai awm e - OST hi mi nuai hnih dawnin an en der tawh.
 
'Kherawlai' film hi September 30, Zirtawpni zanah Vanapa Hall-ah kherawlai a ni dawn a, streaming app lamah chhawpchhuah a ni leh bawk ang.