Mizo film thar 'Kherawlai' chu zanin hian Vaivakawn Auditorium-ah tlangzarh a ni dawn ta. A hmuna kalte tan premiere nghal a ni dawn a, zan dar 8:00pm atangin Runmawi App lamah man chawia en theihin a awm ve nghawl bawk ang. 

Kuminah Mizo film eng emaw zat a chhuak tawh a, en man hla tak tak a awm nual. 'Kherawlai' pawh hi a boruak thlir chuan beisei a sang a, a rawn 'hit' ta viau a nih pawhin a mak lo ang. OST atang ringawt pawhin boruak a rawn siam nghal thei a, en chakawm tawh tak a ni. 

A script hi Muantea Khiangte ziah a ni a, kum 1970 chho velah min chenpui dawn a nih hmel hle. An director hi J.S Tharmawia a ni a, videography lama sulhnu nei tha tak Osiama Pictures chu Director of Photography (DOP) a ni - an kutchhuakin belhchian a dawl viau ang. Shooting hi Burma ram epa awm Zawngtetui khuaah an nei a, he khua hi in 50 bawr vel chauh an ni nghe nghe. 

Mizo film industry-in hma a sawn zel a, Hollywood leh Bollywood te la pha lo mah ila an hnungzuiin rahbi kan tuk chho ve zel. Sum tam tak senga shooting nana khua an din angte pawh kan ti chho ve zel a, entu mipui lam tan pawh a manhla chho tial tial a tih theih awm e.