Kum hnih chhung chawlhsan a nih hnuah Anthurium festival chu tluang takin neih zawh a ni ta a. Kût buatsaih a nih chhan ber chu khualzin mi tam zawk hip nan leh Mizoram tihlar nan a ni ber. Kumin Anthurium festival pawh mipuiin an hlut a, tourism chawikanna mai bakah intihhlimna atan hman a ni a, kan hlawkpui hle niin a lang.

Kumin Anthurium festival-a khuallian Chief Minister chuan Anthurium Kûtpui chuan khualzin tam zawk a hip a beisei thu a sawi a. Mizoram vanneihna sawiin, cheibawl chawp leh siamchawp ni loin, kan ramngaw te leh boruak hi ram dang mi hiptu a nih thu te, kan boruak thianghlim, sik leh sa nuam tak takte chu khualzinmi te hiptu anih thu te a sawi a ni.

Chief Minister sawi ang hian kan ram sik leh sa, ramngaw leh nungchate hi ram dang mite neih ve loh a ni a. Ram thenkhatah chuan khua a lum em em a, hmun thenkhatah a vawt leh lutuk thung a. Mizoram erawh chu nipuiah a lum lutuk lo a, thlasikah pawh a vawt lutuk lo bawk a. Hei vang hian hnam dang tan chuan thildang pawh awm lo mah se kalna chhan tlak a ni a, hemi belhchhah tura khualzin mite hipna tur kan siam thiam phawt chuan tun aia tam lehzual hi khualzin kan hiplut ngei dawn a, a hlawkna teltu tur chu Mizote bawk hi kan ni.

Anthurium festival a ni emaw, Chapchar Kût pawh nise khualzin mite hipna atan kan hman mai bakah kan hnam incheina leh tihdan kan phochhuahna hun a ni bawk hi thil tha tak a ni. Chutih rual erawh chuan kût kan hman apianga kan harsatna tawh ziah chu a neihna hmun chungchangah hian a ni. Lammuala Chapchar Kût kan hmanin traffic jam vangin harsatna kan tawk a, Reiek leh hmun dangah pawh nise Anthurium festival kan hmanin a hmunhma panna turah harsatna kan tawk thin bawk.

Chuvangin, sawrkar hian ngaihtuahna thar sengin kût kan hmanna tur hmun nghet hi siam thei se a duhawm hle. Chu chuan tuna kan harsatna tam tak hmunhma tha, parking felfai mai bakah mipui chetvelna hmunte a awmtir thei dawn a. Hmunhma tha kan neih chuan tourist pawh kan hip lehzual ang a, tam leh zualin Mizo mipuiten a hlawkna kan hmuh ngei a rinawm e.