DOWNLOAD OUR APP

Read latest news on your phone
play-store app-store
app-store
ad
Khuangchawi thla
titi ZALEN
Oct 13, 2019
  • Mahmuaka Chhakchhuak
  • Mahni hnathawhnaah buai nak nak rengin ni tin hun kan hmang a, a chang leh hlim takin kan hmang a, a chang leh ngui deuh bar chungin ni kan hmang liam bawk a, ruahsur avangin khawilai hmun hmunah emaw te chuan chhiatna thlengin nunna hial chan phah te pawh a awm a, kawng diak leh nal avanga motor accident thawm pawh hriat tur a awm zauh zauh bawk a, chutianga chanchin duhawm lo tak tak a khat tawka hre reng chung chuan ‘Fur Chhia’ tia ning em em chunga kan hnathawhna lamah buai reng renga kan hmang mek emaw tih laiin Favang boruak kan han thleng leh ta der mai le.
  • Zing takah khawchhak lam atangin Ni lah chu inthlahrunna nei hauh loin a ngai têin a rawn chhuak leh a, fur laia a rawn chhuak ang ngawt ni loin a eng mawi bik riau hian a hriat lehnghal. Zing thawh a nuamin thawhphan luhai pawh a awm lem loin nguai bur leh thawh fuh loh a awm ta meuh lo a, zing thawh pawh kan zangkhai vah ta mai bawk a, nun a hahdam ta em em mai a ni. Mi chevel thlir ila a hahdamthlak em em vek mai a, mi tin mai hi an hlim vek em ni tih turin hlim hmel an pu vek mai bawk a, a eng emaw hmaa chibai buk ngawt chakawm hmel hi an pu vek hlawm thin ta maite hi Chung lam malsawmna ava han ni chiang tak em.
  • Hmun thengthaw deuhah kal ila khawhawi a nuam em em vek mai a, mit tlin tawkin engkim mai hi a lang fiah kuar bawk a, hla phuah mi tana hla thar phuahna tham turin khawhawi a nuam em em ta maite hi Favang boruak vang liau liau a ni a tih loh theih loh. Motor thawm awm lohna hmun, hmun reh takah kalin han hawi khawthawng vel mah ila kan mithmuh apiangte hian lung a tileng bik riau zel tawh mai a, sava thlawk lai leh phengphehlep thlawk mai maite pawh hian awmzia an nei bik riaute hian a hriat vek tawh mai a ni. Sava hram ri leh chiau ri nak nakte pawh chuan eng emaw sawi an nei vek maiin a hriat tawh a, khawhar mi tan lah khua tihartu vek an ni ta mai site hi Favangin a ken tel vek an ni.
  • Sumdawngte pawh chuan nakin lawka Lal piang lawmna hun lo thleng mai tur hmuahna atan an theihtawpa tan an lak leh hun tak a ni a, ngaihtuahna pawh an hman nasat ber lai a tih theih hial bawk ang. Sum induhthawh hunlai tak a ni a, mawngvawmba ang maiin an phe sek a, thahnem an ngai em em hlawm vek mai a ni. Phai lam leh ram hran atanga bungraw lak tur an ngaihtuah hun laite a ni bawkin biak tur neiten an bia a, biak tur nei lem lote pawhin kal dan tur leh an bungraw lak tur chi ngaihtuahin duhthlan tur mumal tak neihte pawh an tum hlawm mekte pawh a nih ring ila kan ring sual kher awm lo e.
  • Chutih lai mek chuan thingtlang lo neitute pawhin an thawhrimna ata an chawlh hman mek lai a ni a, hlo thlawh a ngai tawh lo a, zuva laka thlai ven chauh chu a ni deuh tawh mai. Hetih hunlai hian thenkhatte chuan thing tuah tur lakkhawlna hun atan an hmang a, thenkhatte pawhin lui lama kal nante a hmangin chakai meichher chhitna hun atan te, sava thang kam nante pawh an hmang bawk. Sava thau hunlai a nih thin avangin Varung awh ngeite an tum thin bawk a. Heng hun hi tawngkam mawi takin ‘Favang Awllen’ (Autumnal Leisure) tih a ni a, zangkhai taka mitinin hun kan hman theih hun tawite awmchhun chu a ni. Tichuan, lo neitute chuan nakin lawka buh seng hun atana lo inbuatsaih lawkna hun atan hmang bawkin buh vuak tumte’n hruih zawlte an lo lai lawk a, buh chil tumte lahin fasuar te an lo buatsaih bawk thin.
  • Favang boruak hi a hun chhung a rei lo hle nain kan Mizo nunah a pawimawh hle thung si. September chawlhkar hnihna atangin October thla tawp thleng a ni a. Chhung tin hnathawh leh vei zawng leh hna tul dan a inang lo ang bawkin he Favang Awllen hunah hian chhung tinte’n mahni ngaih pawimawh zawng zawng khawihna hun atan an hmang thin a, a thente chuan an in sak kum a nih chuan he Favang Awllen hun lai hian ram lamah mau sahna atante an hmang a, châk lakkhawlna atan an hmang thin. Nula leh tlangval thenkhatte pawhin ramhnuaiah thingphurin a thente chuan romantic takin hun an hmangin he boruak nuam tak hi âm takin an hmang bawk thin a ni.
  • He Favang Awllen hlutna hi sawi tur a tam thei viau ngei ang. Kumtluana hah taka ram lama hnathawk thinte tan thawhrah sengna hun a nih chhoh tan avangin nghakhlel leh beisei taka nghah hunlai a nih bakah ram riaka hah taka thlantui nena hnathawh bawrh bawrhna hmun chu hahdam taka an thlir thei tawh dawnin ngaihtuahna thui tak nei chunga an thlir theih hunlai chu he Favang Awllen lai hi a ni.
  • Patling leh val upa deuhte tan mahni chauha ram lama iptepuia chempui lawng chauh aka kal chu khua a har ve duh ngawt ta ve ang. Romei a zam chiai tawh si a, boruak a thian kuk tawh bawk si avangin sava hram ri nauh nauhte chuan khawharna a rawn thlen loh vek a nih chuan mi pangngai nih phak lohna turin amahah diklohna lian tak nei a ni ngei ang.
  • Kei zawng he hunah hian awm mai mai har ka ti a, tunhma lama Beh-ai thang kama thingsemim hmun emaw Vahrit tlatna mual vela kan chettlat lai te ka ngaihtuahin a khawharthlak ngawih ngawih ka ti a. A leh lamah chutiang chu tun hun atan a rem lohna tam tak a awm tawh si avangina humhalh zawnga tan lak a lo ngai tawh zawk si a. A engapawh chu nisela he Favang Awllen boruak nuam tak hi kei ka tan chuan hmun rehah ka awm emaw hmun reh lo laia ka awm pawh ni sela eng emaw tak hian min mawlh reng mai si a, a nuamin a hrehawm duh ngawt mai…

Latest News & Chhiar Hlawh