ZALEN June 28, 2026: Nikum chhung khan Mizoramah khuarel chhiatna thleng vangin mi 13 an thi a, an zinga 12 hi lei min vang niin hi kangmei vanga thi pakhat a awm bawk.

ZALEN RTI zawhna, Disaster Management & Rehabilitation department SPIO-in a chhan danin nikum chhung khan lei min vangin in chhia 295, thlipui vangin 85 leh kangmei vanga 97 a awm a. Tui lian leh lirnghing vanga in chhia a awm lo thung.

Kum 2025 chhunga lirnghin dan chungchang zawhna chhangin SPIO chuan magnitude 3.0 leh a aia na lirnghing tum nga chhinchhiah a ni tih sawiin a thlenna hmun hi Mamit district-ah tum hnih, Hnahthial, Champhai leh Khawzawl district-ah te niin a sawi a. Lirnghing nat ber tum chu March 2, 2025 niin hemi tuma a nat zawng hi magnitude 3.7 a ni a, tihchhiat a nei lo tih a tar lang bawk.

Khuarel chhiatna tawkte chhawmdawlna pek an nih dan zawhna chhangin SPIO chuan Disaster Management Division, Ministry of Home Affairs inkaihhruaina anga pek thin a ni a. Lei min, thlipui, tui lian leh kangmei vanga thite hnenah sawrkar laipui inkaihhruaina angin mitthi chhungte hnenah Rs. 4,00,000 pek thin a ni a. Chhawmdawlna pawisa hi sawrkar laipui leh state sawrkarten 90:10 a intum semin central-in 90% leh state-in 10% a pe thin tih a tar lang.

Khuarel chhiatna hrang hrang thei laka sawrkar inbuatsaih dan tlangpui sawi bawkin khuarel chhiatna chungchanga mipuiten an tih tur leh tih loh tur awaresness radio kaltlang te, pamphlet hmang te, hoarding hmangte leh training hmangin neih a ni.

Sawrkar hnathawk, NGO leh zirlai hnenah Disaster Training neih a ni a. District tinah chhhanchhuahna hnathawktu tur Quick Response Team (QRT) din a ni a. Police Batallion hrang hrangte pawh chhanchhuahna hnathawk thei turin rraining pek an ni a. Mipuiten awlsam taka chhiatna thleng an report theihna turin Khaurel Apps siam a ni.

District Disaster Management Authority (DDMA) tinten zonal officer siamin hengte hi anmahni huam chhung theuha chhiatna thleng buaipui tura tih an ni.

State Emergency Operation Centre (SEOC) leh District Emergency Operation Centre (DEOC) te chu 24/7 a function a ni a. DDMA tinten anmahni huam chhung theuha an hman tur silpaulin pawh an dah khawl bawk.