Mizo shuttler zinga India tana shuttlecock vaw hmasa thei ber, H.Lalthazuala chu Khelo India Athlete (KIA)-ah thlan thar a ni a, a chet that dan azirin kum riat chhungin kum tin Rs. nuai 5 a dawng thei dawn.

Chanmari West, Aizawl rawlthar hi nikum October thla khan Chengdu, China-a Under 17 Badminton Asia Championship-ah India aiawhin a lo inlan tawh a, Mizo zinga badminton-a India aiawh thei hmasa ber a ni.

Thawhtanni khan Khelo India Talent Development (KITD) Department chuan thuchhuah siamin Thazuala hi KIA atana thlan a nih thu hi an tar lang a, a rual hian badminton huangah Rushendra Tirupathi leh Pranauv Ram N te thlan an ni ve bawk tih a tar lang.

Kum 17 pumhlun hnai, Thazuala hi KIA atana thlan a nih avanga hian a chet that dan leh a result azirin kum riat chhung chu kum khat atan Rs nuai 5 thleng sponsorship-ah pek an ni thin dawn a ni.

KIA-a thlan ni tur hian a hmaa chet that a ngaih piah lamah a kawng a thui hle a, Khelo India Talent Identification & Development Committee-in a thlang phawt a, High Power Committee (HPC)-in thlifimin a pawmpui leh phawt a ngai thin.

Thazuala hi Mizoram record chelh mektu niin nikum khan Mizoram Badminton Association (MBA) Official Championship (Senior)-a mipa maltanah kum 16 mi chauh niin a champion a, champion thei naupang ber a ni.

Hyderabad, Telengana-a Pullela Gopichand Badminton Academy (PGBA)-a kum thum dawn inzira awm tawh, Mizo rawlthar hi nikum khan Younex-Sunrise 35th Sub-Junior (Under 15 & 17) National Badminton Championship; All India Sub-Junior Under 15 & 17 Ranking Badminton Tournament leh Yonex Sunrise All India Sub Junior Under 15 &17 Ranking Badminton Tournament-ah Under 17 Boy’s Singles-ah champion bawkin Mizo zinga All India Sub-Junior Ranking Badminton Tournament-a Boy’s Singles category-ah vawi hnih champion thei awmchhun a ni mek.

MBA chuan Thazuala’n hetiang dinhmun tha leh sang a thleng thei hi ropui a tiin a chhuang tak zet tih an sawi a. Hma sawn zel tur leh Mizoram bakah India tihmingthatu ni zel turin duhsakna a hlan tih an sawi.