Kimkima leh G'niei ten an sak 'Ka ngai che' tih hla music video chu a duh a piang en theihin YouTube-ah chawpchhuah a ni ta e. He hla hi Kimkima phuah a ni a, ama YouTube channel-ah upload a ni.  

An hla thar hi Darbu application-ah ngaihthlak theiha chhawpchhuah hmasak a ni a, tunah chuan a official music video en tur a awm ta e. Kimkima leh G'nie ten hla thar an tichhuak tih hria a piangin ngaihthlak an chak a, mipui beisei a pha em tih erawh zawhna awm mek a ni. 

Music video hi Reuben Lalmalsawma kutchhuak a ni a, belhchian a dawl leh pek viau mai. Ani hi tunah chuan videographer lar leh tha ber zinga mi a ni tawh a, a kutchhuak pawh hmuh tur a awm ta nual mai. Zonet buatsaih Thazual Award 2021 a Kimkima 'Best Music Video' lo lakpui tawhtu kha a ni a, beisei a sang a nih pawhin a mak lo ang. An music viodeo tharah hian VFX te pawh hmuh tur a awm a ni. 

G'nie hi Mizo ten rapper kan neih that ber zinga mi a ni a, zaithiam dangte pawhin an thawhpui nasa hle. Kum 2017 daih tawh khan Jaui nen thawkdunin 'Thinlung Sernung' an tichhuak a, YouYube-ah mi maktaduai khat chuangin an hla hi an ngaithla tawh nghe nghe. Kum 2018 khan Rpa Raltea nen 'I La Hria Em' music video an tichhuak leh a, a lar vet vet hle a nih kha. Tun thlengin mite ngaihthlak hlawh zingah a la tel a, YouTube-ah mi maktduai 1.4 zetin an view tawh nghe nghe. 

Kum 2019 khan DJ Lalvenhimi nen 'I Hria Em?' an tichhuak leh a, he hla pawh hian YouTube-ah viewer maktaduai khat dawn a nei tawh bawk. June 2019 khan fam changta MAY-i nen 'Dawt' music video an tichhuak leh a, a hun lai chuan a lar rem rem hle a nih kha - an music video hian viewer maktaduai thum chuang zet a nei! 

Kum 2019 tho khan Victor da scavenger & G'nie ft Zoramchhani 'Kawng a awm' an tichhuak leh a, a lyric video chauh ni mah se ngaihthlak a hlawh hle. February 2020 khan Hriatrengi Lailak nen 'UNI' an tichhuak leh a, hei phei hi chu hit rem rem tak a ni. G'nie official YouTube channel 'G'NIE_OFFICIAL' ah upload niin, viwer maktaduai li chuang an awm tawh. 

Tunah Kimkima nen an thawkdun leh ta a, an video hian viewer engzat tak nei ang maw???