Tennis khawvel, a bikin clay-ah phei chuan chhing zo reng reng la awm lo, Rafael Nadal-a chu kumin French Open-ah a inlan thei dawn lo va, nakum bak inkhelh pawh a tum tawh lo. ‘King of Clay’ hun a tawp hnai ta.

Mipa maltana French Open nomawi la hnem ber, vawi 14 zet la tawh hian kum 19 chhunga a vawi khat nan a tournament ngainat ber hi a khel/mawng bawr (hip) hliam vangin a khel dawn lo a ni.

Kum 36 mi, Grand Slam-a vawi 22 zet champion tawh hi a khawngaihthlak khawp mai a, chawlh mai a tum chhan pawh a kum upat tawh vang pawh ni lovin, a taksa (hliam nasa)-in a tlin tawh loh vang a ni.

“Thutlukna hi ka siam a ni lo va, ka taksa zawkin a siam a ni. Roland Garros-a inlan chu a theih ta lo,” a ti.

“Nakum hi ka inkhelh hnuhnung ber a ni tawh dawn a, chu chu ka rilru a ni a. Tunah hian khel lui ta ni ila, tuna ka tum pawh hi ka thleng zo lo vang,” a ti bawk.

Major tournament-ah Novak Djokovic-a nena champion ngun ber ni lai hian ATP title 70 zet vaw chhuak tawhin chawlhkar 209 zet World No. 1 a ni tawh a, ATP chanchina No. 1 ni rei ber parukna a ni.

King of Clay hian Roland Garros phei chu a hmang thiam zual a, vawi 115 a khelh tawhah vawi 112 zet hnehna a lo chang tawh.

Mallorcan veikhawr hi January-a Australian Open 2nd round-a a inhliam hnu lamah erawh a la inkhel leh ta miah lo thung a. May 28 atangin French Open hi Paris-ah khelh tan tawh tur a ni a, dam hman tum hle mah se a thei ta lo.

Nadal-a hian kum 2005-a French Open-a a inlan vawi khatnaah nomawi la nghalin a hnu kum 17 chhungin vawi 13 zet a champion belh.

Major tournament pakhata ani aia champion ngun reng reng hi an la awm ngai lo.

French Open pawhin kumina Nadal-a a tel lo tur hi an ui hle a. “Kumin chu Roland Garros hian a ngai dawn hle che a ni,” an ti a. “Lo inenkawl tha la, tha zawkin court-ah inlan leh ngei ang che. Nakumah Paris-ah kan inhmuh leh ngei kan beisei,” an ti bawk.