October 5, 2023; Kumin August 1 atanga zangnadawmna ngiata sawrkar nawr nan KMMTTP ram neitu intelkhawm ten Dy. Conservator of Forest, Chhimtuipui Wildlife Division, Office Lawngtlai a mi an dan chu an la chhunzawmzel a, sawrkar atangin thu lawmawm innghahngamna tur an la dawnglo tih an hruaitute chuan an sawi.

Lawngtlai District Land Owners Association te hian KMMTTP a hnathawktute chetchhuah pawh remtilovin hun engemawchen KMMTTP kawngpui pawh zawh hleihtheihlohin a awm a, sawrkar thuneitute leh mipui lam dinhmun enchungin thla hmasa September ni 2, 2023 atang khan KMMTTP kawngah hnathawktute chetchhuah an rem ti a, vawiin thlenga zangnadawmna an ngiatna ah thu lawmawm an hriatloh vangin October 10, 2023 thleng ngaihchan leh phawt nise, zangnadawmna an la hmulo emaw, innghahngamna tur an hrelo a nih chuan KMMTTP a an ram chin humhalh nan hmalak zui nise tiin ram neitu te nimin a thukhawm chuan an rel.

KMMTTP a zangnadawmna ngiat hian Gauhati High Court Aizawl Bench pawn ram pass diktak ti a a finfiah mi 138 te chuan kawng hrang hrangin hma an la tawh a, an duhthusam erawh vawiin thlengin a la puitling theilo chu hriatthiam har an tih thu an sawi.