Aizawl: Kohhran mipuite sum thawhkhawm hmanga inrelbawlna kalpui ve chauh thin ni mah se Kohhran mipui thenkhatte chuan sawrkar emaw tiin mimal leh chhungkaw sum harsatna ah an hnen atangin tanpuina sum leh thil dang an beisei nasa tih Kohhran hmathlir sawihona ah sawichhuah a niin ngaihven a hlawh hle. Mizoram Synod chuan June ni 30, 2015 khan Kohhran hmathlir chungchangah inrawnkhawmna a buatsaih a, kohhran hrang hrang puipate kohhran mipui aiawha kalkhawmte chuan thupui hrang hrang sawiho in Mizoram Synod chu kohhran mipuite'n sawrkar ni hiala ngai an tam tawh thute sawi chhuah niin kohhran mipuite rilru sukthlek danglam ta chu siamthat a ngai nasa zual hle nia an hriat thu sawi a ni. Mizo Kristian te hi sakhuana kawngah kan rinawm tawh lo hle nia sawi a tam hle thin a, Mizoram Synod in kohhran hmathlir chungchanga inrawnkhawmna a neih ah pawh hian sawi chhuah a ni nghe nghe a, mihring rilru inthlak danglam zelah kristian hmasa ten kohhran mitmei an ven nasat ang kha thangthar nunah a awm tawh mang lo nia ngaih theih a nih thu te khel ho niin sakhuanaa kan rinawmna tlak hniam chhan chu politics in kan rilru a hruai nasat vang nia ngaih theih a nih thute sawi ho a ni. Tun hma chuan Synod in ram emaw thil dang lei tur nei se a neitu in rawngbawlna rilru pu in a man tlawm zawkin a lei tir thin a, tun hnu ah erawh chuan Synod chu sawrkar emaw ti niawm takin man to tak tak an chhiar tawh thin a, kohhran mipuite rilru chu nasa takin a danglam tawh a ni tih te chu sawi chhuah a ni bawk. Tun hma chuan thu nun lakluh tur te'n Kohhran mit an tling lo ang tih hlauvin tan an la thin a, tun hnu ah erawh chuan kohhran-in a nawr luih a ngai hial tawh a ni tihte chu he huna an thu khel zing ah a tel a. Sum hnar nghet nei lo kohhran mipuite thawhlawm atanga inrelbawl thin hian a kum tel in thawhlawm a tla hniam a, balance a nei tlem tial tial a, kohhran mipuite'n petu nih aiin dawngtu nih duh thinlung an pu ta emaw tih tur a ni ta hial tih sawichhuah a ni.