March 8, 2023; Mizoram Presbyterian Kohhran, Zoram Hmeichhe Inkhawmpui Lian vawi 50 na, March ni 10-12, 2023 dawng turin Darlawn khawtlang chuan inbuatsaihna vawrtawp a kalpui tawh.

Kohhran Hmeichhe Inkhawmpui Lian hi  Pastor bial pahnih Darlawn Pastor bial leh Darlawn Venghlun Pastor bial ten an in thlen tawm a. 
Darlawn GSA khelmualah pandal sak niin  pandal pawh peih fel a ni tawh a, pandalah hian mi 7,000 atanga 8000 vel leng tura ruahhman a ni. 

Ningani (9.3.2023) zan dar 7 ah pandal hlanna inkhawm neih tur a ni a, tunah hian palai kal tur in report hi 7.3.2023 dar 1 thleng khan 11,370 an ni a, bial la in report lo an awm nual bawk avangin mikhual riak lut hi 12,000 chuang awm rin a ni. Darlawn khaw thenawm atangin  lehlanga kal thahnem tak awm tura ngaih a ni bawk.

Kohhran Hmeichhe Inkhawm Lian vawi 50 naah hian thupui "Pathian nena len dun" Mika 6:8 a ni dawn a, speaker Rev.VL Luaia Hranleh, Executive Secretary, i/c  Kohhran hmeichhia a ni ang. Zirtawpni hi palai thlenkim ni niin Inrinniah Darlawn Kohhran Biak inah rorel inkhawm neih a ni dawn a, he hunah hian kumthara Kohhran hmeichhe hruaitu thlanna neih a ni ang.