Aizawl: Mizoram Presbyterian Kohhran Hmeichhe Inkhawmpui Lian Vawi 47-na, Leisekawt field a neih mekah nimin khan rorel inkhawm neih a ni a, an thurel angsar zingah faina leh thianghlimna kawnga hmalak leh ei leh in dan thianghlim lamah hmalak ni se tih te a tel a ni. Khawmpui chuan Synod Hospital Charity Fund atan rampum huapa Kohhran Hmeichhia Inkhawm thawhlawm vawi 2 lakkhawm nise tihte leh Synod Hospital Durtlang leh John William Hospital Lunglei a mite  tih changtlunna atan leh an mamawhte phuhruk sak nan rampum huapa Inkhawm thawhlawm lakkhawm nise an ti a. Presbyterian Kohhran Hmeichhia Inkaihhruaina Dan Bu ennawnin siam that ngai te siamthat a ni bawk. Khua in a bumro deuh avangin Pandal leh a vel a diakin khawmpui palai ten harsatna an tawh phah nasa hle a,  palai zingah Rallianchhingi (94), Armed Veng ‘S’ Kohhran chu a upa ber nia thudawn a ni. Vawiin Pathianni chawhma dar 10:30-ah Pathian Biak Inkhawm neih a ni anga, khawmpui thupui, ‘I Pathian tawk turin inpeih rawh’ (Amosa 4:12) tih hmangin Speaker, Upa C.Ngurthantluanga’n Pathian thuchah a sawi ang. Report atanga a lan danin Mizoram Synod hnuaia Pastor Bial 197 awm atangin bial 196-in report an thehlut a, Kohhran 818 awmin Kohhran hmeichhe member hi 1,72,655 an awm a ni. Khawmpui hian kum 2017-2018 a Central Kohhran Hmeichhia hruaitu atan heng mite hi an thlang- Chairman- K.Lalliantluangi, Vice Chairman- Lalnuntluangi, Secretary- H.Lalpianmawii, Asst.Secy.- Lalmuanzuali, Treasurer- Lalrinpuii, Fin.Secy.- Lalbiakhluni.