Aizawl: Zirtawp zan atang khan Mission Vengthlang Kohhran Biak Inah Mizoram Presbyterian Kohhran Hmeichhe Rorel Inkhawm vawi 8-na chu hman mek a ni a, zanin hian a tiak dawn a. Kumin Rorel Inkhawm thupui atan ‘Thlarau Thianghlim leh a hnathawh’ tih hman niin Speaker atan Rev. Lalrinmawia hman a ni bawk. Zirtawpni khan Palai thlen kim ni a ni a, zanah Inlawmna leh Report Inkhawm neih a ni. Inkhawm hi Pi Rinchawii, Central Kohhran Hmeichhe Chairman-in a kaihruai a, General Secretary Report leh Bial Report khaikhawm ngaihthlak a ni a, Synod Moderator Rev. H.Lalrinmawian Pathian thuchah a sawi. Nimin nileng khan Rorel a ni a. Tun tumah hian General Agenda 16 an nei a, Bial atanga thu lut, floor-a kal zel lo tura Central Committee-in a hrilhfiah eng emaw zat a awm bawk. Heng bakah hian kum 2018 Rorel Inkhawm chungchang te, kum 2019 Inkhawmpui Lian chungchang te, Inkhawmpui Lian Budget leh Project 2016 - 2017 leh Bial Budget ruahmanna te an ngaihtuah a ni. Nizan khan Rev. P.C. Pachhunga, Executive Secretary i/c Kohhran Hmeichhiain thuchah a sawi. Vawiin chawhma inkhawmah Speaker Rev. Lalrinmawian ‘Thlarau Thianghlim leh a hnathawh’ tih thupui hmangin thuchah a sawi tan ang a, sunna hun leh Kristian Chhungkaw Dinhmun Tehna Trophy leh Certificate hlanna hun hman a ni ang. Chawhnu inkhawmah Speaker hnen atangin thuchah ngaihthlak leh a ni ang a, inkhawm banah hian Mual Inkhawm (Zaikhawmpui) neih a ni bawk ang. Zan inkhawmah Speaker hnen atangin Pathian thuchah ngaihthlak leh a ni leh bawk ang.