ZALEN, Oct. 21, 2024: Mizorama kohhran hrang hrangte inzawmkhawmna tur, Council of Churches in Mizoram (CCM) chu Pathianni hian Synod Moderator-in Mission Veng Presbyterian Kohhran Biak Inah a hawng a, a hma niin rorel inkhawm hmasa ber neih a ni ang.

Pathianni chawhmaa CCM hawnna inkhawm neih tur hi Rev. R.Lalbiakliana, Baptist Church of Mizoram (BCM) General Secretary, CCM dinna tura kohhran hrang telna Joint Committee-a secretary ni bawkin kaihruaiin Rev. R.Vanlalnghaka’n a hawng ang a, thuchah a sawi bawk ang.

He hunah hian Joint Committee Recording Secretary Lalruatkima’n CCM din dan leh chanchin tawi a sawi ang a, hruaitute inhmelhriattirin Rev. Dr. H. Remthanga, Joint Committee member-in a hma ni rorela CCM hruaitu thar atana pawmte a la lut ang.

CCM rorel (business session) hmasa ber hi Inrinni chawhnu hian Mission Veng Biak Inah neih tur a ni a. Hetah hian hruaitu thar tura CCM-a tel kohhranten an chhawp chhuahte an pawm ang a, CCM Inkhaihhruaina Dan (Constitution) pawmin an kal zel dan tur hmachhawp leh ruahmante pawm a ni bawk ang.

A hawnna pual hi Inrinni zan atangin neih tur a ni a, thupui atan ‘Kohhran Inpumkhatna’ (Joh. 17:11) hman a ni ang a. Inrinni zan inkhawmah hian CCM-a tel kohhran hrang hrang hruaituten an kohhran theuh report tawi an pe ang.

Pathianni chawhnu leh zanah pawh vantlang huapin CCM hawnna pual inkhawm a awm ve ve ang.

CCM-ah hian Mizoram chhunga kohhran hrang hrang pariat - Evangelical Church of Maraland (ECM), Evangelical Free Church of India (EFCI), BCM, Isua Krista Kohhran Bualpui (Ng), Lairam Isua Krista Baptist Kohhran (LIKBK), Mizoram Presbyterian Church, Independent Church of India (ICI) leh Wesleyan Methodist Church of India te an tel mek.

Mizorama kohhran zingah member 3,000 nei tling chin tel theih a ni.