Tûn hnaia Mizoram University-in Under Graduate VI Semesters Result a tihchhuahah Pachhunga University College zirlai Laltlanmawii chuan B. Sc.-ah Cumulative Grade Point Average (CGPA) 9.46 hmu-in Department of Mathematics-ah pakhatna, Gold Medalist a ni. A mark hmuh zat hi subject dangah pawh tuman an hmu pha lo; “A pumpuiah pakhatna a ni,” ti pawn a sawi theih âwm e.
Science Chhungkua!: Mac Donald Hill, Zarkawta chêng Laltlanmawii (Mawi Mawii) hi kum 1998, February 24-a piang a ni. A nu leh pa mai bâkah amah thlahtute atang rêngin chhun tur a nei tha ngang mai. An chhungkua hi ‘an Science mi’ hrim hrim. A pa, R.Lalrinkima hi B. Sc., B. Ed. niin tûnah hian Govt. Mizo High School-ah Science (Biology) zirtirtu a ni mêk a. Tin, a pa lama a pî pawh zirtirtu hmasa niin a pate unau pawh hi zirtirtu an ni thuau hlawm. A nu, Lalmuanpuii lah, Rev. Dr. Zairema tunu a ni lehzel bawk a. Zirna lamah pawh B.Sc. tho a ni. Tûnah hian Home Missions School-ah zirtirtu hna a thawk mêk bawk. Unau pathum an ni ni a; a û, Laltlansângi hi kum 2011 Matric exam-a Mizorampuma parukna kha a ni; tûnah MBBS zir zo tawhin Christian Hospital, Serkawn-ah a thawk tawh nghe nghe. An unau zinga a naupang ber, a nutâ pawn a nutâ pawn Class XII Science bawk a zir ve mek— Science Chhungkua tak an ni!

Home Missions Fa Chuam: An unau hian Home Missions School fa chuam tia chhâl theih an ni deuh vek. Mawi Mawii hian Kg I atanga Class XII thleng he school-ah hian a zir. 2014-ah Class X Distinction-ah passed-in 2016-ah Class XII (Science) Distinctionah bawk a passed leh. B. Sc. Ist Semester-ah pawh topper a ni nghal pang. IInd Semester leh IIIrd Semester tih loah chuan topper a ni char char.

Mathe’ Chawk Mi, Mawi Mawii leh Maths!: “Science-ah chuan
Biology hi ka tui lo bur a ni tawp mai!” tiin doctor nih châk lo tak Mawi Mawii chuan a sawi a : “Tui lohna ber subject ka lâk a ngai dawn sia… ka tui miau loh chuan ka zir tha peih lo ang a, ka titha thei nâng,” a ti niah niah. Mathematics chawh chu nuam a tih thu a sawi uar hle mai.
“Class X ka zirlaiin, Pu Siamhranga fapa hian a thlawnin mi dang rualin a hnenah Maths tuition min kaltir ve thin a. Kum tluanin ka kal a, khata tang khan ka tui chho tan,” tiin he thuziaktu hi min han fak der ve a! A nia lawm, Matric exam dawn hnaih phei kha chuan min pui thei dêr tawh. Zirlai thiam lo zual, Class X Board exam ve tur tho te kha a zirtir thei hial tawh tlat a ni!
B. Sc. a zir chhoh dan sawiin, “Lecturer ten assignment min pêk bâkah keimahin chawh tur ka intuk thin a. Kohhran leh khawtlângah zan chhuahna tur a awm loh hi chuan chaw ei kham atangin ka zir tan thin. Zanlai pelh thlenga Maths chawh chang ka ngah mai,” a ti a. “Library leh ka lehkhabu neihsa bâkah internet ka hmang nasa khawp mai… min puitu atan ka hmang tam ber ang,” tia sawiin, “Internet hman nan chuan phone hi a chak berin ka hria a, ka hmang nasa… Ka online reng tho a; mahse, ka lehkha zir hun chhung hi chuan social media ka khawih ngai lo,” Mawi Mawii chuan a ti.
“Vawi tam tak ka’n chawk chhuak thei lo ngei thin a. Mahse, beidawng duh loin ka tang tawlh tawlh thin thung. Vawi li vawi nga vêl ka chawh dik loh hnua a dikna ka’n chawh chhuah hlawl chang hi chuan nuam tak a ni, nuam tak!” tiin a Maths chawh dan a sawi. Mahse, exam laia zan rei tak tak thleng menga lehkha a zir thin thu a sawi lo! “A tlangpuiin ni khatah darkar 6 atanga darkar 7 vêl, ka zir dan ngai rengin mar pâtin lehkha ka zir thin a. Exam lai hi chuan ka mu hle hle thin,” Mawi Mawii chuan a ti.

Kohhran leh Khawtlâng leh Zirna: Zing tawngtai inkhawm, Kohhran inkhâwm zawng zawng (Nilai zan thleng pawn) bâkah TKP thiltihnaa a tel deuh ziah thu a sawi a. Chutiangin, khawtlânga chhiat ni that ni a awm pawn theihtâwp chhuaha a inhman thin thu a sawi bawk. “Kohhran leh khawtlâng thiltihnaa ka tel chuan, bân hnuah lehkha ka zir a ngai a ni mai a. Ka lehkha zir tan hun a tlai a, ka zir zawh hun pawh a tlai a ngai mai a; ka zir hun chhûng chu a ngai reng tho… Kohhran leh khawtlânga ka inhmanna hian ka zirna a tibuai lo!” tiin huaisen takin Mawi Mawii chuan a sawi a ni.
Hei hi Mizo zirlai tam takin kan tih theih loh, nu leh pa tam tak pawhin kan hmuh fuh loh a ni tlat. Zirnaa kan tihchhiat chhanah Kohhran leh khawtlang thiltih tam lutuk kan mawhpuh fo mai. Dik tak chuan inkhawm hun chhung emaw hla zir chhung emaw, a… khawhar kan lenpui chhunga kan zirlai kan thiam hman hi a tam luau lo mai thei. Thenkhat phei hi chu, an bân hun âwm vêlah lehkha kan zir tan hman ve tâwk ta ve ang. Heng thil hian kan zirna a tibuai lo thei a ni tih hi kumin B. Sc. Gold Medalist Laltlanmawii nunah hian a lang chiang hle.
Mawi Mawii hian M. Sc. zir chhunzawm a tum rih lo a. Delhi lamah Coaching Class kal a, UPSC exam awm ang ang hmachhawn tura inbuatsaih a tum mêk a ni.