Aizawl November 29, 2022 :Aizawl South III bialtu MLA Prof F.Lalnunmawia chuan 2018 MLA election-a ram hruaitu atana MNF ministry Zoramthanga kaihhruai sawrkar an tling chu Kohhran leh mipuite tawngtai chhanna a ni, a ti a, hektu awm thin mah se, central sawrkarah CM Zoramthanga chu thil ti thei tak a nih thu leh ngaih pawimawh a nih thu a sawi. 

Aizawl South III South Block huaihawta Political Training, Neuva Hall, Sumsuih-a neia khuallian, bialtu MLA Prof Lalnunmawia chuan, "Kum 2018 MLA election dawna Kohhran leh mipuiten ram hruaitu dila an tawngṭai chhanna chu MNF ministry Pu Zoramthanga kaihhruai sawrkar hi a ni. He sawrkar hnuaiah hian hrileng avanga hun khirh tak kan tawk chung pawhin ei leh barah harsa lutuk lo a kan awm leh Covid-19 vanga nunna chan tlem ber state zinga kan tel hi a lawmawm tak zet a ni. Kan sawrkar-in hmachhawp lian tak tak kan nei a, mi thenkhat ten MNF sawrkar hi central lamah zu hek thin mah se, Delhi tlanga kan CM thil tih theihzia kan hmu chho mek a ni. Hmanni lawkah Sports Minister hnung zuiin central sawrkar Finance Ministry ka zu dawr ve a, kan CM Pu Zoramthanga hi central sawrkar hotute hian an ngaih pawimawh zia a tak ngeiin kan zu hmu ve a ni" a ti.

Prof. Mawitea MLA chuan "Kum 4 kan sawrkar chhungin kan bial chhungah hmasawnna engemawzat kan hmu a, sawisen vek a ni lo. MLA Fund pawh theih anga tha leh tangkaiin kan hmang a, khua leh vengchhung cheina leh inkalpawhna bakah mi harsate insakna, inchung rangva atan te, damlo mangang zual tanpuina atan te enfiah ngamin kan hmang a ni" a ti bawk.

He huna Resource Person Ex MLA TC Pachhunga, Vice Chairman, Sports, ICT & Tourism Development Board pawhin thu sawiin, "MNF sawrkar hnuaiah inkalpawhna  kawng pawh nasa taka sial leh sial belh tum mek zel a ni. Sports, IT leh tourism tih hmasawn nan ADB aṭangin EAP sum thahnem tak Mizoramin kan hmuh belh leh dawn a ni" a ti. Congress chungchang sawiin, "Central-ah an pute belh tur an nei tawh lova, an phur thei tawh lo, chuvangin Congress belh chu ni tlak hnua nilum ai tum ang a ni" a ti a. "ZPM pawh kalphung thar an han sawi chuan lung ti leng ve awm takin an lang na a, mahse a takah han belchiang dawn ila, ralkhata chhimbal leh romei ang mai an ni. An hotu lawk te pawh nihna phuahchawpah te an ruat a, an in pumkhat hlei thei si lo. MNF Workers-te hi kan lungrual phawt chuan kan sawrkar leh ngei ang" a ti bawk.