ZALEN March 11, 2026: KTP General Conference Saitual Organising Committee chuan nimin khan conference an thlena an bungraw lei an hman zawh tawh eng emaw zat chu an khuaa kohhran hrang hrang bakah VC leh YMA hnenah an sem.

Inkhawmpui chhung hian Saitual khawtlang thawhhona a tha hle tih sawi a ni tawh thin a, kohhran hrang hrangten biak in an khar a, mikhual thlen leh usher thlengin kohhran bik sawi lovin an tangho vek nia sawi a ni.

Inkhawmpui zawh a nih hnuah pawh an bungraw hlui hrang hrang - gas thuk, silpauline, pangpar leh thil dang dangte chu a remchan angin organising committee hian a sem a. Bungruate hi kohhran - BCM (North, South & Emmanuel); Salvation Army (Saitual & Centenary Corps); ICI Saitual Kohhran; Seventhday Adventist, Saitual Kohhran; UPC (NEI & Mizoram); Roman Catholic leh Lal Chhungkua/Unity Church leh IKK hnenah an hlan.

Kohhrante bakah hian VC (Venglai I & III) leh Branch YMA (Bazar, Venglai & Chawnpui) hnenah an hlan bawk.

KTP General Conference vawi 61-na kha February 26 leh March 1 inkar neih niin conference awm tawha palai kal tam ber tum nia hriat a ni a, a tawp zanah phei chuan mi 60,000 chuan inkhawm anga chhiar a ni.