Aizawl May 23, 2024 : Vawiin khan Mizoram Journalist Association, Kolasib District te chuan Kolasib khawpui bawlhhlawh sawngbawlna Solid Waste Management Centre, Dihmuntlang an tlawh a. Helai hmun hian ngaihsak a hlawh tawk lova, Management a fel tawk loh avangin dumping dround leh a chhehvelah bawlhhlawh chhunkhawm a tam hle, an ti.

MJA Kolasib District ten an tlawh lai hian Bawlhhlawh hi Dumping Ground-ah a khat deuh vek bakah, Bawlhhlawh thliarhranna tur, Waste Resource Centre a bawlhhlawh an thliarhranna ah pawh duhthu a sam lovin, Waste Resource Centre chhehvel ah pawh hian bawlhhlawh paih a tam hle an ti bawk.

Solid Waste Management Centre hi Pilot project niin, Aizawl khawpui bak district headquarter-a awmchhun a ni a, He centre ah hian thawktu Quarter te nen building changtlung tak awm mah se, heng building te hi vawiin thlengin luahtu awm mumal lovin a tawngtawl mek a, Waste Resource Centre ah hian bailing machine pakhat leh bawlhhlawh nawr na tur thela awmin, bawlhhlawh thliarhranna khawl Belt Conveyor machine a awm lo bawk.

Heng Bawlhhlawh dahkhawm te sawngbawl hna hi mimal pahnih kutah dah niin, anni hian hlawhfa ruaiin bawlhhlawh thliarhran hna an thawk a, team khat hi tun thla tir atanga thawk tan chauh an ni bawk.

Nikhata bawlhhlawh trip hnih chhunkhawmna Solid Waste Management Centre ah hian, thawktu awmreng chungin bawlhhlawh hi a khat deuh reng thin avangin, dumping ground chhehvelah chuan bawlhhlawh a khat vek thin a, a zualpui erawh tunhnaiah JCB hmanga thenfai a ni. Nitin Truck trip hnih chauh a luh avangin a awmsa an thliar zawh hnuah ah chuan hahdam zawka an thawh theih an beisei tih a hmuna thawktu te chuan sawiin, tunah chuan thawktu mi 11 an awm mek a ni.

DUDO Kolasib sawi danin Bawlhhlawh tawih thei lote hi a hralh theih tur chi leh Dumping Ground a paih tur chi te an thliar hnuah a hralh theih tur hi bundle a siam a hralh tur a ni a, a leitu tur sorkarin a thlan 'No Waste Pvt Ltd te' chuan Bawlhhlawh thliar hran a that tawk loh avangin a hralhna lamah harsatna an tawk niin an sawi a, hetihrual hian sawrkar nena MOU an ziah pawh a tawp hrih tih sawiin, buaipui zui an tum tawh lo tih an sawi a, hei vang hian vawiin thlengin heng bawlhhlawh bundle te hi mumal taka hralhchhuah a la awm lo a ni.