Aizawl: Agriculture Department chhinchhiah danin Kolasib district chhungah leilet, buh chinna atana siam theih tur hi hectare 9429 awmin heng zinga 44.89% ( 4233 Ha) chauh chu buh chinna atana hman a ni a. Heng buh chinna atana hman leilet zingah hian 92.05% chu hnam dangin an enkawl a, mahni ngeiin an enkawl chu 7.95% chauh a ni. Zirtawpni khan Kolasib DAO Conf. Hall ah Kolasib district a Buhher khawl lian (Rice Mill) bun dan tur chungchang sawihona 'Interaction and Discussion on Establishment of Rice Mill with WRC Farmers Meeting' neih a ni a. Meeting kaihruaitu R. Lalnunzira DAO Kolasib chuan meeting an koh chhan chu Kolasib Dist chhungah buh thar a tam theih dan tur leh engtiangin nge buh leh balah kan intodelh ang tih ngaihtuahho tur an nih thu a sawi a. Kolasib Dist. a Rice Mill din tum a nih chungchangah Aizawl atangin a zir chiang tura lo kal survey team ten Kolasib Dist. chhung khaw hrang hrang tlawhin thil awm dan an zirchiang mek tih a sawi.