Kolasib DC chuan thuchhuah siamin Mizoram leh Assam inrina Bairabi Zophai leilet enkawltute chu leileta hnathawk turin Zohnahthlak emaw Mizoram mi ngei chhawr turin hriattirna a chhuah a. Thuchhuah tlin thei ngang lo tan ngaihthiamna siamin hnamdang an chhawr dawn a nih pawh in an mi chhawrte inner line permit siamsak turin a chhawrtu chu a phut bawk a, an hnathawh chhung chauh Mizorama awm turin intiamkana ziahpui turin DC chuan a ngiat bawk a ni.

Kolasib DC hian ramria buaina chhuak denchhenin hnam dang chhawr loh hriattirna hi a chhuah a. Bairabi Zophai leiletah hian Mizo tlangval thawk thei an awm lo nge ni? tiin ngaihtuahnaah a awm nghal a ni. Hei hi a dik a nih chuan Mizo thalaite tan thawh tur hmuh ang tawk thawh kawngah chona petu ni thei se a tha ngawt ang. Mi hnam te chu ramdangah kalin an thawh tur ang tawk zawngin hrehawm an pawisa lo hle a, mi ramah inzar pharhin an thawh tawk ang an thawk a, ramdang atangin an ramah mi ram pawisa an thawn lut ruih ruih a ni. Hetiang ang rilru hi Mizo thalai thahnem ngai zingah an awm ve tawh a, hetih lai hian tam tak hi chuan ram pawna mi hna va chhuh chu sawi-loh mahni ramchhunga mahni chanpual ngei pawh an humhim zo lo chu a ni e.

Tunhmain lumet te chu hnamdang an ni a, tunah chuan Mizo tlangvalte’n an hna an chhuh zo ti tih tawh a ni. Hna chungchangah chuan hnamdang cement mistiri te he ramin a buaipuina a rei tawh a, an duh angin rate an in chhiar a, pawisa tam tak an thiar chhuak mek a. Mizoram chhung ngeiah a leilung fate zawk chu an hnuaiah, an mahni puibawmtuah an hmang mai mai chauh a ni ber e. Hripui len vanglai phei kha chuan cement mistiri hmuh tur an awm mang lo a nih kha. Ngaihtuah letin a tlawm thlak ang reng viau.

Mizo hnathawkte hian zirtur an la ngah hle a, thawh thiam bik a awm loa, thiam tum tlat chuan eng hna pawh hi thiam theih vek a ni a, Mizo tih chi a ni lo tih pawh hi kan inhrilh awih laklawh mai mai chauh a ni. Chhawr theih turin hna uluk, thuawih leh hun vawn dik kawngah te insiam tha sela Mizo vek chuan Mizo bawk a chhawr duh zawk a rinawm khawp mai.

Kolasib DC thuchhuah hian thalai rilruah thusawi sela, hnamdangin Mizoram chhunga hna an thawh chhuh turin thalai hnathawkte cho chhuak mawlh telh se.