ZALEN September 11, 2025: Vawiin khan PWD, Kolasib Division Office, Tumpui venga awm chu Court order hmangin kalhsak an ni a, zangnadawmna pek tura court-in a tih an la pek fel loh vang a ni.

Mizoram PWD te hian kum 2013/2014 bawr vel khan Serkhan to Bagha road kawngpui laihzauh hna thawkin mimal ram tam tak a tihchhiatsak a. Ram neitu ten zangna dawmna an hmuh tur zat pawh Sawrkar thu neitu ten an bithliah felsak diam tawh a ni.

Chhan hrang hrang avangin zangnadawmna te hi pek fel mai theih an ni lo. He thubuai hi Kolasib Court-ah hun engemaw chen a inchiah hnuin nikum December, 2024 khan Kolasib Fast Track Court chuan ram neitu ten zangna dawmna an dawn tur te chu PWD-in thla 2 chhunga pe fel turin order a lo tichhuak tawh a ni.

Zangna dawmna tur sum hi a vaiin Rs. 3, 42,25444.09p a ni a, ram neitu te hi mi 62 niin Saiphai leh North Chaltlang khua mi te an ni.

Kolasib Court order hi PWD lam chuan an tih hlawhtlin mai loh avangin ram neitu te lungawi lo chuan Kolasib Court-ah kumin March thla khan Execution Petition an filed a. Court chuan hun tiam siam sak leh mah se, PWD-in zangna dawmna chu an la pek theih loh cheu avang leh thu mumal an neih theih loh avangin Kolasib Fast Track Court Judge R.Vanlalena chuan PWD, Kolasib Division bik Office building, Tumpui Veng, Kolasib a mi kalhsakna tur Order chu a tichhuak ta a ni. He tih rual hian PWD Office motor leh JCB te bakah khawl lian dang engemaw zat chu Court hian a hrensak bawk a ni. 

Heng bakah hian a tul ang zelin Code of Civil Procedure, 1908 in thu neihna a pek angin Office building leh JCB bakah khawl lian dang te leh office computer te chu auction-a (lilama) hralhsak theih a ni.

Tun hnaia Supreme Court of India order khauh tak avangin execution petition te hi thla 6 chhung a chinfel ngei ngei tur a ni.